UNA diz que'l delitu de la Campa Torres nun pue prescribir

La vocera d'UNA en Xixón, Yolanda González, esplica que'l deterioru de les pieces tien de tratase legalmente como un delitu continuáu, “colo que nun puede considerase prescritu”.

“La conducta que tendría d'enxuiciase, que supón el deterioru continuu y progresivu de les pieces arqueolóxiques, nun ye una conducta puntual y referida a un momentu concretu, sinón que persiste nel tiempu”, esplica González.

Afirma que la mala traza na que s'atoparon les pieces, asina como la perda d'información que supunxo'l mal almacenamientu, nun ye resultáu d'una actuación concreta nel tiempu, “sinón del descuidu, despreciu y falta de respetu que se tuvo pol nuestru patrimoniu a lo llargo de más de diez años, tratándose d'un deterioru progresivu y agraváu nel tiempu”

Por tolo anterior, Yolanda González considera que tamos énte un delitu continuu o permanente nel tiempu porque se trata d'un incumplimientu claru del deber de conservación que lleva consigo, o pue llevar, la destrucción de los bienes.

Asina, la vocera d'UNA considera incomprensible aplicar la prescripción de 3 años yá que nesti casu “el plazu computaríase dende que se punxo'l puntu a esta situación o dende que cesó la conducta, daqué que nun asocedió hasta la primavera d'esti añu”.

En base a esta idea presentó la so denuncia UNA énte la Conseyería de Cultura'l pasáu mes d'abril. Yolanda González declaró que "estos bienes formen, de xuru, parte del Patrimoniu Cultural Asturianu, y como talos merecen midíes de caltenimientu y defensa sobre los que la Conseyería de Cultura ostenta una evidente responsabilidá. La llei 1/2001 de Patrimoniu del Principáu d'Asturies resultaría dafechu aplicable y la conducta referida sería constitutiva d'infracción cuantimenos grave".

La vocera acabo reclamando una rempuesta inmediata de la Conseyería "tanto énte la nuestra denuncia como énte una estroza evidente del nuestru patrimoniu".