Espinosa diz que va caltener los compromisos con Asturies

La ministra de Mediu Ambiente, Mediu Rural y Marín, Elena Espinosa, dixo que'l so departamentu va caltener los compromisos con Asturies na parte de costes y na d'agües.

Sicasí, Espinosa reconoció que los recortes del Gobiernu central van afectar a "dalguna infraestructura grande d'agües a nivel nacional", anque defendió que se ta trabayando pa aumentar la inversión público-privada que permita caltener el 100 por cien de los fondos previstos.
  
La ministra, que participó esti miércoles na inauguración d'una estación de tratamientu d'agua potable pa los conceyos del occidente asturianu, comprometió amás que les ayudes pa los damnificados poles inundaciones del pasáu mes de xunu van tramitase "de momentu" una vez se realicen les valoraciones reales. Nesti sen, matizó que nel sector agrícola, estos informes nun son inmediatos porque los efectos puen apaecer col tiempu.