Abbas: "les conversaciones indirectes nun progresaron bastante"

|

Mahmud Abbas va dicir a la Lliga Árabe que les conversaciones indirectes con Israel nun progresaron abondo pa xustificar unes negociaciones de paz de frente.

"Abbas dirá-yos que, hasta esti momentu, nun hai nada que puea convencemos pa empezar les negociaciones directes", afirmó esta fonte a Reuters. "Nun hai nada nuevo", añadió.
Aguantando la presión estaoxunidense, el líder palestín dixo que quier en primer llugar que les conversaciones indirectes faigan progresos, específicamente nes cuestiones de seguridá y fronteres d'un estáu palestín que pretende fundar na tierra qu'ocupa Israel dende 1967.
  
Mañana tien previstu dirixise al comité pal procesu de paz de la Lliga Árabe n'El Cairu sobre les actuales conversaciones mediaes por Estaos Xuníos, qu'empezaron en mayu depués d'aprobase un plazu de cuatro meses que va acabar en septiembre. L'enviáu estaoxunidense pa Oriente Próximu, George Mitchell, reunióse la última vegada con Abbas el pasáu 17 de xunetu en Ramala.
  
Los responsables palestinos indicaron que, nesa xunta, Abbas refugó un pidimientu estaounidense pa empezar les negociaciones directes. El primer ministru israelín, Benjamin Netanyahu, afirma qu'él quier empezar darréu les conversaciones directes.
  
"Dirémos-yos a los árabes que los americanos nun traxeron nada con ellos. Probablemente, vamos siguir los dos meses que queden (de conversaciones indirectes) y entós vamos ver lo que pasa", indicó esti oficial palestín.
  
Netanyahu, que prometió "asumir los riesgos políticos" p'algamar la paz pero que tovía tien qu'anunciar los xestos necesarios p'aumentar la confianza de los palestinos, asegura qu'Abbas ta perdiendo'l tiempu. Pela so parte, el líder de l'AP sorprendió pola so resistencia a la presión estaoxunidense.

Contador Estadistiques