El Bloque califica d’atentáu’l retayu nes ayudes a la vivienda

El Bloque por Asturies considera que ye un atentáu a les polítiques sociales y un grave retrocesu en derechos, el retayu de 140 millones d'euros nel Plan Estatal de Vivienda.

“El tsunami de lliquidación de les polítiques sociales por parte del PSOE sigui la so imparable marcha y amenaza con desfacer Asturies, que pierde agora unos 5 millones d'euros y que va ver afectada gravemente la so política de vivienda n'aspeutos fundamentales”, afirmen dende la organización.
 
Esclarien que’l retayu afecta especialmente a les persones más nueves, “que van ver desaniciada l'ayuda a la entrada directa pa la compra de vivienda”. Al empar, señalen que pon en peligru miles de puestos de trabayu.

El Bloque considera intolerable esti retrocesu en materia de derechos sociales y denuncia que la política d'axustes, retayos y contención del gastu del PSOE namás afecta a les polítiques sociales. “Ye incomprensible que la supuesta política d'austeridá del Gobiernu se base nun ataque permanente a estes polítiques”, apunten..

El Bloque propón al Gobiernu d'España que, “en llugar d’atacar permanente los derechos sociales”, abra una nueva vía pa asoliviar el déficit públicu: “dende l'añu 1997 el Ministeriu d'Industria concedió a la industria de armamentu créitu a 20 años ensin intereses, por valor de más de 14.000 millones d'euros. Hasta la fecha namás se reembolsó un 1% d'esta suma. La devolución d'una parte significativa de dichos creitos beneficiaría de forma notable a les arques públiques. Teniendo en cuenta, amás, que les partíes militares nel añu 2010 xuben a la nada despreciable cantidá de 18.000 millones euros, destinaos fundamentalmente a la compra d'armamentu cada vez más sofisticáu y letal”.

Per otra parte, “entendiendo y compartiendo los xustos llamentos del Gobiernu de Asturies por esta grave midida de retayu”, la organización esixe que se compense de forma inmediata al traviés de la eliminación de gastos “totalmente superfluos”, como la emisión per parte de la TPA de la Fórmula 1 o la Lliga de Campeones, “que suponen, a lo menos, más de 10 millones d'euros del dineru de toos los asturianos”.