Día del Llibru Asturianu

La Fiscalía archiva la denuncia sobre la Campa Torres

|

La Fiscalía archivó la denuncia del PP sobre posibles delitos contra'l patrimoniu históricu, a consecuencia del descubrimientu de restos arqueolóxicos na Campa Torres.

Según afirmó en rueda prensa'l conceyal del PP nel Conceyu de Xixón, Manuel Pecharromán, el fiscal archivó les dilixencies porque'l delitu prescribió, al pasar más de tres años dende qu'esos materiales se dexaren en dichu sótanu.

Sicasí, apuntó Pecharromán, la Fiscalía afirma nel so escritu que'l llugar nun reunía les condiciones necesaries pal  caltenimientu apropiáu d'esos materiales y que supón un deterioru innegable de dichu material, especialmente de la información científica que la acompañaba. Fechos qu'evidencien, dixo'l conceyal 'popular', una "incuria y falta de control" de les persones y organismos  alministrativos implicaos na protección del material.
  
Según manifestó'l conceyal del PP, el fiscal reconoz que los fechos denunciaos constitúin "un delitu contra'l patrimoniu históricu, polo que-y da la razón al PP".
  
Pecharromán fizo referencia a la "incompetencia" de l'Alministración rexonal y del mesmu conceyal de Cultura, Justo Vilabrille, al qu'acusó de "tapar gravísimamente un escándalu referíu al patrimoniu de tolos xixoneses y asturianos". "Una actuación", dixo, "que desacredita a los responsables políticos que nel so momentu negaron que los materiales atopaos sufrieren nengún dañu".
  
Pecharromán recordó que nun sótanu de la Campa Torres apaecieron más de 300 caxes col gruesu de los materiales que, tanto al Conceyu de Xixón como al Principáu, costó-yos más de seis millones d'euros.

Comentarios

Esto mete miéu, como dicia l'otru. Mete miéu. El patrimoniu asturianu tratáu pior que la pación nuna cuadra y lo más que dicen ye que nun taba en condiciones. Los que nun tán en condiciones de tratar col patrimoniu asturianu son ellos, que nin saben lo que ye nin ponen el más mínimu interés por conservalu. Ye más, talamente paez que-yos pretaría que desapaeciera, porque asina toos seríamos más "iguales" y "solidarios" y Asturies sería tan neutra como'l llaboratoriu d'estética visual de la Llaboral, si ye qu'esistiera.

Contador Estadistiques