UNA pide un cambiu na política de vivienda énte la supresión d’ayudes

El voceru de vivienda d’UNA, Daniel Fernández, dixo que la eliminación d'ayudes pa la compra de vivienda del Ministeriu, desixe polítiques actives empobinaes a axustar el preciu.

Pa Fernández la crisis económica “tien de camudar nuna oportunidá pa que les polítiques de vivienda seyan un preséu de control del mercáu inmobiliariu, torgando que la especulación seya'l motivu pol que munches persones, sobre manera les más moces, nun seyan quienes a tener una vivienda propia, al tiempu que s'acaba colos guetos de mileuristes que se tán formando nes periferies de los núcleos urbanos, demientres que nos centros de les ciudaes atópámonos con innumberables viviendes vacíes y cortiles ensin construyir, esperando tiempos meyores”
 
“El Gobiernu asturianu tien d'escaecer les sovenciones y facer un apueste por aumentar la presión fiscal tanto sobre la vivienda vacía como de los impuestos de compra venta de les viviendes que nun se dediquen a vivienda habitual”, camienta yá qu’una sociedá moderna “nun puede permitise'l luxu d'infrautilizar el so parque inmobiliariu y les viviendes tienen de tar a disposición de los ciudadanos na modalidá d'alquisición o arriendu”, afirmó.

El voceru de vivienda tamién destacó que l'ampliación ilimitada de les ciudaes trai un mayor costu en tresporte y nos servicios públicos, al tener que facer nueves infraestructures y calteneles, “lo que supón un costu inasumible pa los Conceyos que se ven obligaos a baxar la calidá y el númberu de les prestaciones qu'ufierten” lo que se fai especialmente patente “nesta dómina de crisis económica”.

Dende UNA destacaron que la política si tien una influencia granible nel accesu de la vivienda y en “Asturies sabémoslo perbién, porque la obsesión de la conseyera Noemi Martín de favorecer la venta de los stocks de promotores y constructores xeneró un mercáu dual de la vivienda, onde los pisos nuevos xuben llevemente de preciu y los de segunda mano sufren una cayida notable de los precios al quedar fuera de les midíes de fomentu de la Conseyería de Vivienda”.

Según Daniel Fernández, “la política errónea de vivienda queda totalmente coxa ensin les ayudes del Ministeriu, insostenibles nel tiempu per otra parte, y desixe que d'una vegada por toes encaren con valentía'l problema políticu de fondu, los precios de les viviendes siguen ensin tar afayaes depués del boom inmobiliariu, y a esta problemática tien de respondese con midíes polítiques” concluyó.