El Bloque denuncia l’estáu de 30 presos políticos mapuches

El Bloque por Asturies “denuncia y alerta” del grave peligru de muerte que cuerren 30 presos políticos mapuches en fuelga de fame en delles cárceles del Estáu chilenu.

El Bloque por Asturies denuncia que les autoridaes carcelarias chilenes nun dexaron hasta'l momentu la entrada a médicos independientes que pretendíen evaluar l'estáu de salú de los presos y suspendieron les visites de los familiares que, en dellos casos, moviéronse cientos de kilómetros. “Estes midíes son una grave violación de los derechos humanos y un hostigamiento y presión sicológica contra los presos políticos y les sos families”, afirma la organización.

Los presos políticos mapuches demanden la devolución de los sos territorios ancestrales, el fin de l'aplicación de la Llei Antiterrorista y la Xusticia Militar a les persones que participen en movilizaciones sociales, el fin del usu de testigos encapuchaos nos xuicios, la desmilitarización de les Comunidaes Mapuches, el fin de la persecución xudicial y policial contra la Nación Mapuche, el fin de los procesamientos pola doble Xusticia Civil y Militar, el fin de los asesinatos selectivos de dirixentes mapuches, la llibertá de toos los presos y preses políticos mapuches y la inhabilitación del fiscal Miguel Ángel Velazquez.

La organización nacionalista esixe al Estáu chilenu'l respetu de los derechos humanos y los derechos de la Nación Mapuche reconocíos pol Conveniu 169 de la OIT y la Declaración de los Derechos de los Pueblos Indíxenes de la ONX, atención médica independiente que garantice la vida de les persones deteníes, continuación de les visites familiares y la puesta en llibertá inmediata de los presos y preses políticos mapuches.

El Bloque por Asturies fai un llamamientu a la presencia d'observadores internacionales nes Audiencies Preparatorias y nos Xuicios Orales que van empezar en curtiu, a reforzar les visites y acompañamientos a los presos políticos y les sos families pa garantizar la so seguridá y a una amplia movilización y presión internacional por que el Estáu chilenu respete los derechos humanos y los derechos ancestrales de la Nación Mapuche.