Día del Llibru Asturianu

‘Democracy for Asturies’ quier dar a conocer la situación del país

|

“Llego’l momentu de dar a conocer fuera d’Asturies la nuesa realidá y de la xunida del nacionalismu d’esquierdes al rodiu de proyeutos como ‘Democracy for Asturies’”, indicó Mariu Arbesú.

Ayeri, 23 de xunetu, presentóse en Xixón la iniciativa ‘Democracy for Asturies’, una campaña que quier da-y voz a la esquierda nacionaliega pa recoyer sofitos internacionales y favorecer un procesu de democratización n’Asturies, indicaron los impulsores de la iniciativa.

“La campaña quier dar a conocer fuera d’Asturies la situación sociopolítica y de conflictu permanente na que vivimos” señaló Mariu Arbesú, qu’apuntó que ‘Democracy for Asturies’ quier desplicar fuera d’Asturies “qu’hai una realidá diferente a Fernando Alonso, a Letizia Ortiz, los Premios Principe o los mineros traidores del SOMA”.

Según Paloma García Fernández, el proyeutu tien l’oxetivu d’ameyorar la situación que como pueblu carecemos, “pero pa qu’esto seya posible ye fundamental asitiar Asturies nel mapa políticu mundial”.

Coles mesmes, calificó la iniciativa como un apueste ambiciosu poles relaciones polítiques globales y la solidaridá internacional p’ayudar a construir una democracia dafechu n’Asturies, “onde los nuesos derechos son violaos pol Estáu español”.

Sobre la situación del país recordaron que los derechos sociles y colectivos tán maxicaos, “nin se reconoz el derechu a falar la nuesa llingua, nin podemos decidir el marcu políticu o socioeconómicu nel que queremos desendolcarnos”, solliñó Arbesú.

“Esti ye un procesu imparable y mañana llegará’l momentu de tener representantes de la esquierda nacionaliega nes instituciones, ye hora de que se puea construyir una alternativa democrática dende’l nacionalismu d’esquierdes y esa iniciativa yá ta en marcha y ye imparable”, solliñó Arbesú pa finar

‘Manifiestu por una democracia plena’
 
P’afalar esti procesu, los empobinadores de la iniciativa asoleyaron un manifiestu que puen roblar toles organizaciones polítiques y persones, asturianes o de fuera de les nueses lleendes, que tean d’alcuerdu col mesmu.
 
El manifiestu de la campaña ‘Democracy for Asturies’ fala deentamar un procesu políticu y social cola fin d’algamar una democracia plena. El documentu tien siete puntos qu’entamen desplicando les carauterístiques d’Asturies como nación.

Darréu, diz que’l país nun pue decidir por sigo mesmu, “carez d’un marcu políticu impuestu por España”, y fala del derechu d’autodetermín. Los siguientes dos puntos son sobre la situación llingüística, desplicando la situación del idioma asturianu y afitando la oficialidá como un derechu irrenunciable, calificando’l conflictu llingüísticu como un conflictu políticu, “al negase la FSA, con IU nel Gobiernu, y el PP, a almitir principios democráticos”.

Depués fala de la situación socioeconómica con un modelu que califiquen de “neocapitalista”, “ye urxente que la sociedá tenga la capacidá de decidir que modelu quier”. Llueu, falen de que nel nuesu país se reprime a los sectores críticos, recordando a los sindicalistes Candido y Morala o los 14 mozos de Cangas que se-yos pidió 35 años de cárcel por participar nuna concentración antifascista.

L’últimu puntu del manifiestu fala d’algamar un modelu medioambiental cantenible, “el Muselón, la regasificadora, les térmiques, la ZALIA, los eólicos… son namás dalgunos exemplos de les agresiones a esta tierra”.

Pel momentu, la campaña recibió’l sofitu d’organizaciones como Jaleo d’Andalucia, les mocedaes del Shinn Fein, la Young Organitation of the Scotthish National Party, Endavant y Maulets de Cataluña o Ikasle Abertzaleak del País Vascu. Amás, de sofitos de xente independiente de delles naciones ensin estáu de tol continente.
 

Comentarios

La  xunida del nacionalismu, non tien que facese solu con les fuercies de esquerda, si non tien que albarcar a toos los que, veyan una surdia pa Asturies, dientro del nacinalismu.Facer un garrapiellu en pro de una alternativa!!!!!Non mirar mas baxu  al que non ye d'ezquerdes!!

Nunca entenderé que una persona d´izquierdes pueda ser nacionaliega. Pa mi ye daqué chocante y contrapuesto lleno de contradicciones. Lo mesmo que un nacionalismu lliberal o pro-capitalista, totalmente contradictori,o pero bono... ¿adaptase o morrer non?. Si hai que metelo too nuna pota y cocelo sin mirar si mezcla bien... faese... ¿qué más da? ¿ailos que traguen con too y con más, non?

"situación de conflictu" y "derechos violaos pol estáu español" son conceptos que suénenme abondo, pero non precisamente n'Asturies. Paezme que los asturianos tendríemos de ser yá lo suficientemente maduros como pueblu pa nun tener qu'asumir discursos ayenos.
Asina, esta iniciativa, que como toles iniciatives que suponen l'esfuerzu de persones paezme respetable, véola un poco infantil y si me permitís un poco friki.
Paezme qu'agora mesmo tendríen de centrase les organizaciones más en falar d'una iniciativa política seria y con posibilidaes reales d'entrar nes instituciones.
Un saludu.

Contador Estadistiques