Sánchez refuga'l debate sobre los averaos a Cascos

El presidente del PP, Ovidio Sánchez, refugó esti vienres l'alderique surdíu nel senu del partíu sobre les distintes sensibilidaes pa cola posibilidá de Cascos como candidatu.

Asina, refugó falar sobre'l comunicáu realizáu esti xueves pol sector averáu a Cascos, soscritu por diez alcaldes y 27 xuntes llocales del PP n'Asturies pidiendo al presidente del PP, Mariano Rajoy, que convoque la Xunta Directiva, y llendóse a dicir que "fueron los mesmos alcaldes y presidentes de xuntes llocales los que dixeron, non solo que nun lo suscribíen, sinón que nin siquier se faló con ellos".
  
"Polo tanto nesi tema nun quiero más debate", resaltó Ovidio Sánchez, según informó'l PP d'Asturies. "El partíu lo que pretende ye la unidá, trabayar a favor de les elecciones y llevar alantre'l proyectu de Mariano Rajoy, que ye lo qu'interesa a Asturies y a España", resaltó.
  
Per otra parte, los diputaos del PP na Xunta Xeneral del Principáu José Agustín Cuervas-Mons y Carlos Galcerán, respondieron a preguntes pola situación interna del partíu y l'organización esti vienres d'una espicha en Xixón n'honor a Francisco Álvarez-Cascos. Los diputaos llendáronse a dicir que sobre esi asuntu remítense a les declaraciones oficiales del PP d'Asturies y confirmaron que "nun van asistir a dichu eventu".