El nacionalismu critica l'anunciu del zarru de les mines en 2014

El Bloque fai un llamáu a la unidá d’acción contra’l zarru de les mines. Mientres, UNA diz que’l problema ye’l fracasu del Principáu coles polítiques de reactivación económica.

Ante la propuesta de reglamentu aprobada pola Comisión  Europea y qu'establez el fin de les ayudes estatales a la minería del carbón non competitivo antes del 15 ochobre de 2014, “lo que de fechu vendría suponer el zarru de toles esplotaciones mineres en Asturies”, el Bloque por Asturies considera que tala decisión ye d'una gravedá manifiesta que manca l’interés económicu y social de Asturies, y en particular de les Cuenques Mineres qu'entá caltienen una gran dependencia d'esta actividá”.
 
El Bloque recuerda que la decisión foi tomada pola Comisión Europea, “que nun ye una entelequia sinón que ta compuesta por persones con nomes y apellíos, diches persones fueron escoyíes, fundamentalmente, polos grandes grupos políticos europeos a los que pertenecen tantu'l PP como'l PSOE”.

Per otru llau, recuerden que nestos momentos nos estaos europeos impunxéronse les polítiques de salida de la crisis más conservadores y ultraliberales, “de les que son un fiel reflexu les midíes aprobaes pol gobiernu ZP, refrendaes pol Gobiernu de Asturies”.

Nesti sentíu rescampla que lo que fai la Comisión ye treslladar al ámbitu européu eses polítiques de contención del gastu a cuenta de lo que seya, “nesti casu la destrucción de miles de puestos de trabayu, pa tapar d'esa manera los grandes furacos del sector financieru priváu”. Del mesmu mou, recuerden que’l sector nuclear nun dexa de promovese.

“Resulta evidente que les Cuenques Mineres siguen ensin remontar la reconversión, tal que puede comprobase viendo la tasa de paru esistente y la constante sangría demográfica que sufren, debíu fundamentalmente al fracasu de les polítiques reindustrializadoras y de dinamización económica llevaes a cabu”, camienten.

Afirmen que cola aplicación d'esta midida, la situación  va agravase de manera radical unviando a miles de trabayadores al paru, “non yá de la minería, sinón tamién del restu de sectores económicos qu'inevitablemente se verán afectaos”.

Poro, el Bloque por Asturies fai un llamamientu a la sociedá pa movilizase pa consiguir que se dea marcha tras a esta propuesta de Reglamentu, dando pasu a la ellaboración d'un marcu estable que garantice la continuidá de la explotaciones mineres asturianes como reserva estratéxica..

Amás, el Bloque esixe'l cambéu de les polítiques siguíes hasta agora nel usu de los fondos mineros, “de tala manera que priorícese, radicalmente, la xeneración de nuevu texíu industrial y económicu sobre la base de la promoción de proyeutos qu'axunten les garantíes abondes de futuru”.
 
UNA destaca'l fracasu absolutu de los planes de reactivación
 
El voceru d'UNA, Faustino Zapico, quixo destacar que'l problema de fondu ye'l fracasu absolutu de los distintos Gobiernos asturianos pa reactivar les zones mineres y llograr crear actividaes productibles alternatives al carbón.

Faustino Zapico acusó a los distintos executivos asturianos de "marafundiar años y años de fondos mineros y ayudes estructurales, y agora, cuando s'anuncia'l piesllu de les mines pal 2014, Asturies atópase cola pesllerada d'una de les sos principales actividaes económiques ensin esistir alternatives vidables a la mesma".

Al empar, recordó que "el mesmu modelu de xestión de los fondos mineros, non controláu pol Parllamentu sinón polos autodenominaos axentes sociales, tenía como verdaderu oxetivu mercar la paz social a cuenta de la reestructuración de les zones d'Asturies que más sufrieren la crisis de la minería".

Pa Zapico, l'ausencia d'un plan estructural qu'empobinara les ayudes europees escontra'l tresformamientu productible, la inversión en formación calidable ya innovación, esplica'l “fracasu absolutu” na reactivación económica de les zones mineres.

Afirma amás que les actuaciones planiábense sobre la marcha, “partíense pa premiar o castigar políticamente a un grupu o otru y primóse les inversiones n'infraestructures que pudieren inaugurase en dómina electoral, frente a otres inversiones menos espectaculares pero más necesaries"

Zapico tamién quixo destacar que’l “fracasu” refléctase na perbaxa tasa d'actividá, la emigración de los mozos que se ve espeyáu na perda y avieyamientu de la población y sobre manera "na sensación xeneralizada de que llevamos 20 años en crisis y que'l Gobiernu asturianu aspira a xestionar dicha crisis, non a superala".

Dende UNA tamién se solicitó a la XE que venceye'l piesllu de les mines al llogru d'oxetivos económicos y sociales, “porque si non el piesllu traumáticu nel 2014 de les mines deficitaries, pue ser el golpe definitivu pa les zones mineres, que yá tán anguaño fuertemente escayíes".

Zapico añedió que los asturianos tienen que ser responsables de les sos decisiones y nun buscar los culpables siempre fuera, “porque en bona midida somos los primeros causantes de la situación".

Pa finar, apuntó que sedría positivo que la XE esixera resultaos más visibles del usu de les sos ayudes y denunciare públicamente'l so usu indebíu, “porque dexaría a los ciudadanos xulgar con una visión más amplia y clara l'actitú de los sos gobernantes".