"Vamos proponer un Día d'Asturies xunitariu y ensin sigles"

Rafa Palacios anunció que’l Bloque va treslladar a toles fuerces asturianistes, asina como sindicatos y movimientos sociales, una propuesta pa facer un 8-S xunitariu y ensin sigles.

El voceru de la organización nacionalista y ex direutor de l’Axencia Asturiana de Cooperación anunció la iniciativa n’esclusiva al traviés del videochat colos llectores qu’Asturies.com entamó ayeri, 22 de xunetu.

“Dende equí aprovechamos p’anunciar que vamos facer un llamamientu pa aconceyase con toles fuercies, sindicatos, movimientos y entamar un 8-S ensin sigles, pol futuru d’Asturies”. Palacios dixo qu’esi Día d’Asturies xunitariu consistiría nuna movilización pela mañana baxu una mesma pancarta ensin sigles, pa que darréu, cada organización entame l’actu que quiera.

“El 8 de setiembre ye’l momentu de que tolos interesaos en defender Asturies salgan a la cai, vamos facer tolos posible pa que seya una convocatoria xunitariu ensin sigles, dar una respuesta a la situación d’anguaño y que l’asturianismu se vea”, afirmó.

Plataforma asturianista

El voceru del Bloque respondió a les multiples entrugues de los llectores sobre la xuntanza del asturianismu políticu pa les eleiciones de 2011. Palacios reconoció qu’anguaño tienen contautos con toles fuerces polítiques del asturianismu y que tán normalizando les rellaciones.

“Tamos falando con delles organizaciones y non escluyimos a nadie, tamos construyendo una alternativa fuerte, caminando haza la xunidá d’acción Ye complicáu, pero vamos facer el máximu esfuerzu pa que haya un proyeutu dende Asturies y p’Asturies, tenemos esa obligación”, solliñó.

Palacios faló d’algamar un proyeutu de mínimos ensin escluyir a naide, “si non nun ye un llamáu a la xunidá de verdá, hai que mirar p’alantre y dexar diferencies a un llau. Amás, la mayoría del asturianismu nun ye militante en nenguna fuerza política”.

Ente la xente que nun escluí tamién tán Valledor o Andecha Astur. Sobre’l lema del últimu cogresu d’UNA, ‘Construyendo l’alternativa asturiana’, el voceru del Bloque afirmó que ye’l momentu de pasar de les pallabres a los fechos, “yá que tol asturianismu diz lo mesmu”. Sicasí, apuntó que col PAS la xuntura pue tar más complicáu, “yá que tienen la volunta de siguir con URAS”.

Posibilidaes eleutorales

Palacios reseñó que pa llegar a a xente hai que treslladar a la sociedá que l’asturianismu ye una alternativa, “esti país necesita aire nuevo no político, plantegar una nueva forma de facer política, algamar una plataforma de compromisu con Asturies”.

Pal voceru del Bloque, una plataforma asturianista pue recibir votos de mucha xente que votó otres fuerces n’anteriores eleiciones, “que pensó nel votu util”. “Agora hai qu’ilusionar a muncha xente que nun ta contenta colo qu’hai pero que nun sal de casa nes eleiciones”, afirmó.

Palacios recordó que na próxima llexislatura va discutise la reforma del Estatutu d’Autonomía, “un testu que tendrá que recoyer los mesmos derechos que se reconocen a otros ciudadanos del Estáu”. Poro, afirmó que l’asturianismu tien que tar representáu na Xunta Xeneral, “tenemos que tener voz propia nel procesu de reforma”.

Cabezaleru    

“Ye mui ceo pa dicir quien va encabezar les llistes, nun ye’l momentu, tamos nun momentu de falar con otres organizaciones, agora mesmu nun ye lo importante”, dixo sobre’l posible cabezaleru d’una plataforma xunitaria.  Con too afitó qu’hai quien encabece les llistes, “y esperemos que nun seya la llista del Bloque, qu’haya munches más fuercies nesa llista”

Sobre’l papel dientro del Principáu

El voceru del Bloque dixo que la so organización trabayó dientro de les instituciones pa que la esquierda asturianista tuviera presencia, “normalizar el nuesu mensaxe y que llegara a la sociedá, anguaño l’asturianismu tien presencia sociedá, tamos cerca de la xunidá y se nos escucha”.

Afirmó que nos espacios qu’ocupó’l Bloque nun había “chiringos” del PSOE, “por eso ye la necesidá de favorecer la representación del asturianismu”. Sobre la política llingüística del Executivu d’Areces respondió a un llector que nun consideraba que participamos nun gobiernu represor.

Restu de llexislatura

Palacios resaltó que lo que queda de llexislatura, “anque ye poco tiempu”, va ser una época de debates interesantes: “va haber un plenu’l 8-S onde diremos lo que queremos pa esti país, tamién va haber un debate sobre l’estáu d’Asturies, una fuelga xeneral, el debate de los presupuestos de 2011… Vamos ser una voz pa los movimientos sociales, pal asturianismu, la esquierda y l’ecoloxismu. Queden pocos meses, pero hai debates interesantes p’amosar la nuesa opinión”, apuntó pa finar.