Chupa Chups dará por acabaes les negociaciones el llunes

Chupa Chups alvirtió a los trabayadores de Villamayor que'l periodu de consultes va acabar esti llunes, día 26, si'l comité d'empresa nun acepta negociar los términos del ERE.

En declaraciones a Europa Press, el representante d'USO, Alejandro Toraño, esplicó que la empresa niégase a valorar la propuesta d'un plan de viabilidá que plantegaron esti miércoles los asesores de los trabayadores, como alternativa a los despidos.

Dicha alternativa consistiría na puesta en marcha d'actividaes encaminaes a meyorar les ventes del carambelu nun porcentaxe a definir nel plazu estimáu d'un añu y estableciendo una serie de midíes de control pal siguimientu de los resultaos. "Paralelamente negociaríase'l plan social y l'ERE quedaría d'esa forma pendiente d'aplicación", señalaron esti xueves fontes sindicales.
  
Siempre según los sindicatos, los 121 trabayadores de la factoría tán convocaos el llunes a una asamblea urxente, previa a una nueva convocatoria de la mesa de negociación prevista pa les 16 hores en Noreña.
  
Per otra parte, el comité de Chupa Chups va efectuar esti vienres el recuentu de les "cerca de 30.000 firmes" d'oposición al zarru de la fábrica, que se van entregar "la selmana que vien" nel Rexistru Xeneral del Principáu.