Les esportaciones baxen un 2,26%

Les esportaciones en mayu registraron un descensu del 2,26% sobre 2009. Mientres, Asturies rexistró en xunu 16.126 afiliaos estranxeros a la Seguridá Social, un 1% más que nel 2009.

Les exportaciones asitiáronse en 232.877 miles d'euros según l'Institutu Español de Comerciu Esterior (ICEX). El descensu debióse principalmente a la cayida de les ventes de bienes d'equipu, -maquinaria y principalmente buques-, semifactures de fierro y aceru, y motocicletes y testiles.
  
D'otra manera, les esportaciones eleváronse nos sectores agroalimentariu, llecheru, nel de materies primes, en semifactures de metales y en productos químicos.
  
No que se refier a les importaciones, éstes algamaron los 309.382 miles d'euros, lo que supón un aumentu del 117,1 por cientu al respecto de les cifres del mes de mayu del añu pasáu, especialmente relevante en carbón y mineral de fierro. De resultes de lo anterior, la balanza comercial del mes de mayu presenta nel Principáu un déficit de 76.505 miles d'euros.
  
Nos primeros cinco meses del añu, les esportaciones rexonales aumentaron un 36,49 por cientu, colo qu'Asturies sigue siendo la comunidá con mayor subida interañal. Nesi mesmu periodu, les importaciones eleváronse un 31,49 por cientu, colo que'l déficit comercial asitióse ente xineru y mayu en 103.753 miles d'euros, un 9 por cientu menos que nel 2009.
  
Per árees xeográfiques, los aumentos más significativos de les ventes concéntrense n'Europa y América del Norte, con crecimientos tamién importantes nel continente africanu. Pel contrario, persisten los descensos de les ventes a América Llatina y Oceanía, mientres que les realizaes a Asia caltiénense prácticamente nos niveles del 2009.
 
MÁS AFILIAOS ESTRANXEROS
 
El númberu mediu d'afiliaos estranxeros a la Seguridá Social n'Asturies algamó en xunu los 16.126, lo que supón un crecimientu interañal del ún por cientu, con respecto al mesmu mes del añu pasáu. En toa España, la media d'afiliaos estranxeros asitióse en 1.899.660.
  
Según la estadística publicada güei pol Ministeriu de Trabayu y Inmigración, por réximes, del total de trabayadores estranxeros 10.746 pertenecen al xeneral, un 66,6 por cientu; 2.294 al llar, un 14,23 por cientu y 1.994 son autónomos, un 12,36 por cientu. Del restu, 447 tuvieron ocupaos nel sector agrariu; 411 nel carbón y 234 desarrollaron actividaes rellacionaes cola mar.
  
Amás, del total de trabayadores 5.926 yeren comunitarios, mientres que 10.201 veníen de países non pertenecientes a la Xunión Europea, como Ecuador (1.319), Colombia (1.196) y Marruecos (872).