El Conseyu de Cooperación refuga la celebración del Festival Aereu

El Conseyu de Cooperación y de Solidaridá mostró'l so desalcuerdu a la celebración del V Festival Aereu de Xixón al considerar que "enmazcara" actos de propaganda militar.

Asina, entienden que l'exércitu quier meyorar la so imaxe pública, y reducir la percepción negativa que puean tener d'elles la sociedá, según una nota prensa posterior a la celebración del Conseyu celebráu ayeri martes.
  
Coles mesmes, el Conseyu tamién dexó claro, col votu namás en contra del PP, que, al so xuiciu, "ye vergonzoso que nun país con más de 4 millones de persones desemplegaes, 125.000 persones probes n'Asturies, siga aumentándose añu tres d'añu l'aportación a los gastos militares y espilfarrando cantidaes inxentes de dineru de los y les contribuyentes en festivales d'exhibición militar".
  
El Conseyu ta formáu por un conceyal de cada grupu políticu (PSOE, IU y PP), amás de representantes d'ONG y persones de reconocíu llabor en favor de la cooperación. Presídelu l'alcaldesa del Conceyu.
  
Per otru llau, unióse, cola astención del PP, al Manifiestu 'Les Persones Primero' de la Coodinadora Estatal d'ONGD, nel que se fai un llamáu a los líderes políticos y de Gobiernu de les alministraciones y instituciones públiques pa qu'impulsen midíes de llucha contra la crisis que se dirixan prioritariamente hacia los responsables y causantes de la mesma. Pa ello proponen la creación d'una tasa a les transacciones financieres, midíes fiscales que recayan sobre los que más tienen y recortes que nun actúen contra'l gastu social y la economía productiva.
  
Tamién se pide que se calque nel so compromisu cola llucha contra la probeza, col Desarrollu Humanu y colos Oxetivos del Mileniu, calteniendo los sos compromisos d'Ayuda Oficial al Desarrollu, tanto a nivel estatal como nes alministraciones autonómiques y llocales nes que la participación y vinculación de la sociedá civil cola cooperación al dessarrollu ye tovía más cercana y directa.
  
Nel Conseyu tamién s'apoyó, col votu en contra del PP, que se tengan en cuenta les enmiendes presentaes por distintes coordinadores d'ONGD al Proyectu de Llei de Creación del Fondu pa la Promoción del Desarrollu, como'l que se xestione dende'l Ministeriu d'Asuntos Esteriores o que s'execute una auditoría.