Los muertos salen de les tumbes falando n'asturianu

|

‘Night of the living dead’ (La nueche de los muertos vivientes) ye’l primer llargumetraxe dobláu al asturianu de la hestoria. La película va estrenase mientres L’Arribada 2010.

Según informa’l blogue oficial del festival de lliteratura asturiana, la estaya ‘Vagamar’, va acoyer l’estrenu tovía nuna fecha ensin afitar. Sicasí, les feches de L’Arribada sedrán ente’l 18 al 25 de setiembre en Xixón. Amás, tamién va proyeutase na xornada ‘Per Asturies’, que s'entamará en Colunga’l viniente 5 de payares.

‘Night of the living dead’ (conocida n'español como ‘La noche de los muertos vivientes’) ye una película de 1968 dirixida por George A. Romero, considera un clásicu del cine universal y que dio orixe al subxéneru de cine de zombis tal como ye conocíu anguaño.

La trama ye la clásica del xéneru; los muertos tornen a la vida, espardiendo la so mesma condición al traviés de los Estados Xuníos y atacando a los vivos p'alimentase de la so carne. Sicasí, anque l’argumentu pue paecer perconocíu, ‘La nueche de los muertos vivientes’ foi la primer película con esi tema.

Anque foi una película de baxu presupuestu (114.000 dólares), foi rodada en blancu y negru y cinta de 16 mm, foi dirixida por un director nuevu nel so tiempu y un plantel d'actores amateurs, cuando non familiares y amigos del propiu Romero, el film ye considerada una obra clásica del horror por munchos críticos de cine, y asitióse nel llugar 93 na llista de los 100 meyores películes americanes del American Filme Institute mientres el so centésimu aniversariu.

‘La nueche de los muertos vivientes’ foi un ésitu y el so direutor convirtióse en director de cultu. George A. Romero, que darréu dirixió cinco películes más sobre’l mesmu tema, definió cola so visión particular les que sedríen les carauterístiques de los zombis cinematográficos mientres otros trenta años. En 1990 Tom Savini dirixió un remake en color d'esta película.

'Night of the living dead' doblóse al asturianu nel estudiu de grabación CMG y ye un productu de Gonzali Producciones. Equí pues ver e trailer orixinal de la película.
 
Darth Vader: "Yo soi to pá"
 

 

Contador Estadistiques