El Bloque diz que’l Principáu quier esmantelar educación infantil

El Bloque por Asturies acusa al Principáu d'atacar la enseñanza pública y entamar un procesu d'esmantelamientu de la Rede d'Escueles Infantiles col cese del Equipu Direutivu.

“Esta midida pon en peligru la inclusión d'esti ciclu de 0-3 años como una parte más de la rede asturiana d'enseñanza pública, balerándola de conteníos formativos y educativos”, solliñen.

El Bloque por Asturies denuncia que’l Gobiernu d’Asturies “una vegada más de forma autoritaria y prepotente”, toma una midida ensin cuntar con sindicatos, asociaciones de pas y mas y trabayadores.

“Vuelven fuxir del diálogu y escuéndese detrás de les vacaciones de branu pa tapar les sos vergüences, eludir les sos responsabilidaes y tomar una midida que va contra la calidá educativa y los intereses de les families asturianes que demanden cada vez más esti ciclu”, señalen los nacionalistes.

El Bloque por Asturies considera fundamental el caltenimientu de los Equipos de Direición, “polo que les midíes tomaes convierten en insostenibles los centros, provoquen inestabilidá y ponen en peligru'l so futuru”.

“Son midíes que ruempen unilateralmente los convenios roblaos colos Conceyos, col
Ministeriu d'Educación y frayen la Llei Orgánica d'Educación”, apunten, amás de señalar qu'adelantren otru grave problema; la situación de más de 400 educadores que trabayen nestos centros y que s'atopen nuna situación d'indefinición xurídica y llaboral.

Pal Bloque ye evidente qu'estes midíes emtamen a amosar la verdadera cara de la Llei d'Axuste, apocayá aprobada nel Parllamentu asturianu, “y que va significar un ataque ensin precedentes a la educación, la sanidá públiques y les polítiques sociales”.