Felgueroso renuncia a ser candidata a les eleiciones del 2011

L'alcaldesa de Xixón, Paz Fernández Felgueroso, anunció esti martes la so intención de nun presentase a la reelección nes eleiciones municipales del 2011.

Con too, dexó claro que nun se va porque tea "frayada, cansada o desilusionada". "En política hai tiempos y responsabilidaes", indicó antes d'apostar por una candidatura socialista renovada pa enfrentar una nueva etapa de progresos y cambios pa Xixón.
 
Asina lo fixo en rueda prensa nel Conceyu, acompañada pol secretariu xeneral de l'Agrupación Socialista de Xixón, José Manuel Sariegu. "Voi siguir trabayando con toles mios fuerces hasta les eleiciones del mes de mayu", apuntó.
  
Felgueroso fixo mención a los sos 48 años de vida profesional, 25 d'ellos nel sector públicu, y reconoció qu'al entamar el so tercer mandatu yá sabía que "yera razonable que fuere'l caberu". La rexidora tamién estimó'l sentise arropada polos xixoneses tou esti tiempu.
  
L'alcaldesa manifestó que sigue nel so puestu con tola ilusión del trabayu que fai y pol ciñu de la ciudadanía. Ye más, aseguró que va siguir trabayando cola mesma intensidá qu'hasta la fecha en favor del desarrollu de la ciudá. "Satisfice tolos mios deseos de sirvir a lo público", indicó.
  
Nesti sen, reconoció que l'alcaldía foi'l cargu públicu que más satisfacción-y dio. "Alcontréme mui bien y difruté nel sen de faer coses", indicó. Tampoco quiso olvidase de les primeres responsabilidaes nes qu'al haber poques muyeres foi "cabeza de llanza".
  
Preguntada sobre los asuntos de los que se siente más arguyosa y si marcha con algún escayu claváu, dexó claro que siempre queden coses por facer, dao qu'una ciudá ye un organismu vivu. Sicasí, anteponiendo qu'ella namás ye la cabeza visible de toa una Corporación, destacó'l poder contribuyir al cambiu de la ciudá qu'otros anteriores yá entamaron.
  
Ente otres coses, resaltó'l cambiu dotacional, tanto cultural como deportivu, n'espacios verdes, industriales, l'establecimientu del Parque Científicu y Tecnolóxicu, la creación del Xardín Botánicu, la puesta en marcha del Acuariu y de Talaso -anque esti últimu por terceros-.
  
Coles mesmes, refirióse a los más de cuatro millones de metros cuadraos d'espacios verdes, de los qu'indicó que ta" bien arguyosa", especialmente del renováu parque de los Periconos.
  
Nesti casu, señaló que nel Debate sobre'l Conceyu de la selmana próxima van esaminase los datos que demuestren que la ciudá siguió meyorando y construyéndose de manera que-y permita ser curiosa pa visitantes y inversores.
 
CONSOLIDACIÓN Y DIVERSIFICACIÓN INDUSTRIAL
  
Felgueroso destacó'l Parque Científicu y Tecnolóxicu, dao que supunxo un cambiu cualitativu nel texíu industrial con una media d'edá nueva y cualificada, ente 33 y 34 años. A esto unió la industria tradicional y el futuru sostenible que paez que lu espera al estelleru Factoríes Juliana. Una combinación d'empreses madures y qu'apuesten pola internacionalización. "El mio proyectu estrella por antonomasia son les persones", resaltó.
  
Coles mesmes, calcó nún de los proyectos que va cambiar el futuru de la ciudá, que ye'l Plan de Víes, a lo que sumó'l de la movilidá col 'metrotren'. Felgueroso reconoció que va tener que velu acabar "como ciudadana d'a pies". Nesti puntu, señaló qu'hai proyectos bien ambiciosos que, anque vayan más lentos, son "irreversibles". La rexidora recordó que'l proyectu nun ta deteníu, como lo demuestra la construcción de la estación provisional.
  
Coles mesmes, l'alcaldesa apuntó qu'esplicó la so decisión ayeri llunes a la Executiva socialista municipal, igual que güei lo fixo a la Xunta de Gobiernu Llocal nel Conceyu, antes de celebrar la rueda prensa, y mañana va facelo a l'Agrupación Socialista de Xixón. "El partíu conocía la mio posición", afirmó.
  
A esti respecto, indicó que dio les sos razones y destacó que tuviera "un feliz y llargu periodu pa desarrollar planes y proyectos". A esto unió que fueron 12 años -van cumplise en mayu del 2011-  que, al so xuiciu, supunxeron una oportunidá bien importante de facer realidá los compromisos garraos y de meyorar la ciudá. Xixón, pa ella, ye una ciudá "bien reivindicativa, pero muestra tamién los sos ciños", repostió.
  
Sobre'l so futuru, adelantó que nunca se sintió mal cuando tuvo que dexar un puestu de responsabilidá. "Nun tengo'l jet-lag de los políticos", calcó. "Voi tener la mio vida llena y satisfecha", añadió antes de reconocer que va echar de menos a los sos compañeros de Corporación, sin olvidar que tovía-y queda "muncho llabor" hasta mayu del 2011.
  
Tamién indicó que nunca s'aburre y que-y presta lleer, viaxar, "cafiar", bromió. "Toi segura que voi sentime bien pasiando per Xixón", manifestó. Nun dudó l'alcaldesa n'alvertir a la próxima Corporación que va dir examinando la ciudá p'aconseyar sobre meyores o defectos detectaos, ironizó. Sobre'l nuevu candidatu, calcó en que nun-y presta dar conseyos anque avanzó que lu va apoyar con toles sos fuerces. "Voi collaborar cola persona escoyida", apuntó.
 
DELIBERACIONES SOBRE'L CANDIDATU
  
Pela so parte, Sariegu indicó que la Executiva socialista xixonesa entendiera los argumentos de l'alcaldesa, a la que-y manifestaron el so respetu y almiración". "Ye la meyor alcaldesa del mundu", apuntó. Coles mesmes, valoró de la rexidora la so "demostración calidable y calidá humana".
  
Tamién esplicó que mañana se celebrará un Comité Municipal del PSOE nel que se va entamar la deliberación sobre'l candidatu que se va a proponer pa les próximes eleiciones. Según Sariego, el reglamentu internu del partíu marca que nes ciudaes de más de 50.000 habitantes y con gobiernu socialista s'abra en septiembre un periodu de primaries, que se convocaría si contase con polo menos un 40 por cientu de votos de los afiliaos. Con too, hasta los últimos díes de setiembre non podrá ratificase'l candidatu, sobre'l que mañana se verán les propuestes.