SUATEA esixe la creación de la especialidá de llingua asturiana pal profesoráu

El sindicatu educativu SUATEA esixe al gobiernu central una mayor protección pal asturianu y pal gallego-asturiano. Nun comunicáu demanda la creación de la especialidá d’asturianu pal profesoráu y la inclusión de la llingua asturiana nos nuevos planes d’estudiu de Maxisteriu.

No que cinca a la creación de la especialidá, el sindicatu recuerda que’l Conseyu Escolar del Estáu aprobó la creación de les especialidaes d’asturianu y gallego-asturiano. Asimesmo conseña que “la Conseyería d’Educación tien que facer efeutiva la sentencia del tribunal supremu que ganó SUATEA  na que se declara contraria a derechu la esistencia de les plantiyes funcionales n’educación, considerando illegal la regulación de la figura de sobrantes d’horariu y de les especialidaes afines”.

Por ello SUATEA pidi a l’alministración “qu’estes places se conviertan en places de plantiya orgánica y que se de a les vacantes correspondientes l’estatus de places de plenu derechu a tolos efeutos. Nesti sen, tenemos que dicir qu’hai 26 places que tan cubiertes por profesoráu funcionariu de carrera en primaria y 4 en secundaria; amás hai 152 interinos en primaria y 70 en secundaria”.

Tamién demanda la inclusión del asturianu nos “nuevos planes d’estudiu de los graos de Maestru, la mención (especialidá) en Llingua Asturiana. Con ello los estudios de Llingua Asturiana algamaríen calter d’estudios reglaos integraos con normalidá y al mesmu nivel académicu que les otres menciones (especialidaes)”.

Finalmente’l sindicatu recordó “la necesidá de que nel futuru Estatutu d’Autonomía d’Asturies se declare la oficialidá de la Llingua Asturiana y el Gallego-asturianu nel so territoriu”.