Burilo: “Ye un momentu bonu pal rock astur, anque falta contunuidá”

Miguel Fernandi, ‘Burilo’ (Lluanco, 1979), ye la voz de la formación de ska-rock n’asturianu ‘Skama la Rede’, que vien d’espublizar el so tercer discu; ‘Ye too mentira’.

Va díes que’l discu ta na cai, ¿qué tal ta funcionando?

A nivel de crítiques tamos bien contentos, la inmensa mayoría son positives. La verdá que salimos del estudiu convencíos en que diba cayer bien ente la xente. El nivel de ventes, colo difícil que ye vender un discu agora mesmo, tamién ta siendo altu. Nun creo que tardemos muncho n'esgotar la tirada de 500 cd's que se sacaron de mano.
 
‘Ye too mentira’ ye’l tercer discu de Skama, ¿Cómo evolucionó la formación?

La principal conclusión ye que depués de siete años el grupu ta consolidáu, pese a que nos últimos dos tuviemos qu'incorporar de forma escalonada a tres persones y facer un cambiu na instrumentación. Sabemos perfectamente como queremos sonar y como queremos tresmitir les nuestres reivindicaciones.
 
¿Al ser un grupu reivindicativu, cómo s’afronta a la hora de componer les lletres nun cayer nel panfletismu?

Esa evolución dátela la esperiencia como lletrista y el cumplir años. Cantar "Puxa Asturies dixebrá" o "Yá, yá, yá, oficialidá" ta bien pa les primeres lletres o pa siguir glayándolo nes manifestaciones, pero nun podemos siguir escribiendo lletres col mesmu estribillu. Siguimos pidiendo lo mesmo, por desgracia, pero con otres palabres.
 
Una novedá ye dexar la reivindicación a un llau y incluyir un cantar d’amor

Si, tamién hai otru cantar, "La resaca yá vendrá" que nun va mas allá que falar d'una nueche de comedia. El cantar d'amor dio pa munchu debate nel local d'ensayu, pero al final decidimos incluyila nel discu y ye de les canciones que mas nos presten.
 
Desamor, pieslle d’empreses, la situación llingística… Toles temes que se traten nes lletres son abondo murnios. Sicas, podríemos dicir que Skama ye un grupu gayoleru, que nun dexa tastu amargu al sentilo

En tiempos de crisis hai que ser tamién optimistes. Seguro que munches de les persones que compraron el discu tan nel paru, ensin un duru, pasándolo mal y planteándose emigrar. Nun queremos pintar un futuru negru, queremos criticar la situación pero sacar un sorrisa y afalar a siguir peleando.
 
¿Qué referentes musicales tien Skama la Rede como grupu?

Ye una cuestión complicada de contestar. Somos siete persones, mas los dos técnicos de soníu y hai influencies de too tipu y estilos. Anque si nos guiamos a como sonamos, bandes como Skalariak, Obrint Pas, Talco y Banda Bassotti puen ser los referentes mas cercanos.
 
¿La escena del rock astur ta yá consolidada?

Creo que si. Los mas veteranos aguantamos mecha mentres los mas mozos van consolidándose. Ye un momentu bonu, anque tovía falta continuidá y que sigan saliendo mas.

¿Qué sedría anguaño del rock astur ensin Dixebra?

Yo siempre dixi que si nun llego a sentir a Dixebra con quince años quiciás nunca me planteara facer grupos de rock na nuestra llingua y igual tampoco pensaría como pienso en términos idiolóxicos. Dixebra sigue siendo un referente pa los mozos qu'agora empiecen a tener concencia pero tamién, por suerte, yá tienen tamién mas espeyos onde mirase.
 
¿Hai dalgún cantar que seya ‘el cantar de Skama’? (que-y preste tocar al grupu, que pidan nos conciertos)

Nun hai conciertu onde nun toquemos "Internacionalista" o "Campu de batalla". Sería como si Los Berrones nun tocaren "Chacho" o "Nun yes tú", salvando les diferencies. Depués d'esti discu tengo claro que "Albo-rada impopular" y "La resaca yá vendrá" tamién van ser de les imprescindibles.
 

En Skama, dalgunos de los componentes son militantes del asturianismu políticu n’estremaes formaciones, ¿ye’l vuesu grupu un exemplu de que la xuntanza ye posible?

Comparar un grupu de músicu con una xuntaza política nun me paez afayaizo. De toes formes, los llectores d'Asturies.com saben que soi un firme defensor de la xuntaza de la izquierda nacionaliega y sí l'exemplu de Skama La Rede val pa dalgo bienveníu seya. Equí hai militantes de dos organizaciones distintes y otres persones que, ensin militar en dengún sitiu, tamién puen aportar coses.
 
¿Y nun hai rocea ente Candás y Lluanco dientro del grupu?

Jajajaja. Agora yá tengo aliaos. Anantes yeren toos de Candás menos yo. Agora, con Xandru y Fer de Villaviciosa yá peleamos en comuña jajajaja. Si qu'hai piques, anque yá visitamos un día a Xuárez, miembru del Infierno Candasín, con una camiseta del Marino.
 
Skama yá entama a sonar fuera d’Asturies, ¿cómo reciben fuera’l soníu y les lletres del grupu?

Bien. Por suerte, en Galiza o n'Euskal Herria yá tienen asumíu y ven como normal que los grupos nun tienen porque cantar en castellanu. Amás, el tema d'internet val pa promocionase de forma afechisca. Yá nun ye raro que toquemos fuera d'Asturies y la xente coreé les nuestres lletres. Nun sabes como presta ver a gallegos, cántabros, castellanos o vascos cantando n'asturianu.