Zapatero nun va dir esti añu a la fiesta minera de Rodiezmo

José Luis Rodríguez Zapatero nun va acudir esti añu a la fiesta qu'entama'l sindicatu mineru SOMA-UXT en Rodiezmo (Lleón), que se va celebrar el 5 de setiembre.

Zapatero ye un convidáu habitual a la cita de Rodiezmo dende que s'escoyó secretariu xeneral del PSOE nel 2000. Ellí, xunto al secretariu xeneral d'UXT, Cándido Méndez, suel empezar el cursu políticu col anunciu de revalorización de les pensiones mínimes pal añu siguiente.

Sicasí, esti añu'l Gobiernu anunció una conxelación de les pensiones pal 2011 -anque precisamente les mínimes sí van siguir subiendo- y, amás, la cita de Rodiezmo va celebrase a menos d'un mes de la fuelga xeneral qu'UXT y CC.OO convocaron pal 29 de setiembre en protesta pola reforma llaboral.
  
Según les fontes, Zapatero "consideró pertinente nun dir" y nun va alegar problemes d'axenda. Eso sí, el xefe del Executivu va dir a últimos d'agostu a Shanghai (onde se celebra la Esposición Universal) y bien posiblemente tamién a Xapón y, anque'l vienres 3 de setiembre yá hai Conseyu de Ministros, la so ausencia de Rodiezmo'l domingu 5 dará-y la oportunidá de visitar algún otru país si lo considera necesario.
  
El pasáu miércoles, nel Debate sobre l'estáu de la Nación, el presidente dixo que va dir a Rodiezmo "munchos años más" pero de manera intencional evitó confirmar espresamente la so presencia esti añu. El presidente respondía asina al líder del PP, Mariano Rajoy, que-y preguntaba si esti añu acudiría a la cita. Zapatero respondió que va dir "munchos años más" y retó a Rajoy a dir él alguna vez.