Pons califica a Cascos como "un gran candidatu

El vicesecretariu de Comunicación del PP, Esteban González Pons, calificó a Cascos como "un gran candidatu, no referente a la posibilidá de que Cascos seya cabezaleru n'Asturies.

Sicasí, dixo esti llunes que son los órganos de la formación los que tienen de decidir sobre les candidatures. "Nun soi quién pa terciar ehí", remachó.
  
Amás, en declaraciones a Onda Madrid recoyíes por Europa Press, González Pons criticó'l "estraordinariu baruyu" que tienen los socialistes del PSOE y del PSC a cuenta de la sentencia sobre l'Estatutu y destacó qu'un hipotéticu pactu PP-CiU diba suponer un nuevu modelu de gobiernu pa Cataluña pero non un nuevu modelu d'Estáu.
  
González Pons espunxo que mientres los dirixentes socialistes defenden la Constitución y el fallu del Tribunal Constitucional n'Andalucía y Madrid, en Cataluña dicen "otra cosa radicalmente distinta" al reclamar una reforma constitucional pa "llanzar el mensaxe de la fragmentación" ente'l "pueblu español y el catalán".  "Ye un auténticu cambiu de la Constitución".
  
Al pregunta-y sobre les declaraciones del presidente de CiU, Artur Mas, denunciando la capadura física que sufrió'l Estatut, respondió que'l Constitucional "nin capa, nin corta nin amputa", simplemente reconoz si les normes s'adapten o non a la Carta Magna. "Cuando certifica qu'una norma nun se llenda a la Constitución nun amputa nada, ta reconociendo que venía amputada yá dende l'orixe", argumentó.
  
El voceru 'popular' aludió tamién a una posible alianza ente'l so partíu con CiU y manifestó que "un hipotéticu" pactu ente ambes formaciones facilitaría un nuevu modelude gobiernu en Cataluña, mientres que'l PSC y CiU lo que planteguen ye "una reforma del modelu d'Estáu". Calcó en que'l so grupu nun ye partidariu de cambiar el modelu d'Estáu nin la Constitución -como tampoco lo ye'l "90 por cientu de el españoles"--y esixó al PSOE que "güei mesmo" esclare si quier "una Constitución nueva" o prefier caltener la que ta en vixencia.