Javier Fernández: "Si vosotros queréis, daré'l pasu como candidatu"

El secretariu xeneral de laFSA-PSOE, Javier Fernández, anunció esti domingu ante cerca d'un millar de militantes que va ser el candidatu socialista a la Presidencia del Principáu.

"Si vosotros asina lo queréis, yo voi dar el pasu pa poneme al mandu de la candidatura del PSOE n'Asturies", afirmó Fernández mientres un actu políticu en Xixón que cuntó cola presencia del lehendakari Patxi López.

"Toi conveníu de que podemos llograr mayoríes de progresu p'Asturies y esta comunidá precisa otra vegada un gobiernu d'esquierdes, socialista", aseveró de la que recordó que'l Comité Federal del PSOE aprobó esti sábadu los calendarios de candidatures pa los comicios municipal y autonómicu del próximu mes de mayu.

D'esta miente, Fernández amosóse "disponible". "Toi disponible pal mio partíu y pa la mio tierra, p'Asturies, porque tengo'l fondu convencimientu de qu'esa ye la mio responsabilidá nesti momentu. El futuru tien de ser meyor que'l pasáu y tenemos la obligación personal y moral de trabayar por que la vida de los nuesos fíos seya meyor que la nuesa", defendió.

"La crisis diznos que'l futuru puede ser peor, pero tenemos que ser capaces de trabayar por una economía al servicios de les persones y non al revés. Por eso precisamos un gobiernu que conoza Asturies, los sos problemes y que tenga idees, que s'asiente nun partíu seriu, cohexonado, un gobiernu que seya consciente de los nuesos raigaños y la nuesa identidá", argumentó'l secretariu de la FSA-PSOE. "Si cunto con vosotros quiero que vosotros cuntéis conmigo pa ganar y encabezar esi gobiernu", añadió.

Según señaló, "va ser necesariu facer cambeos, pero non nes polítiques sociales". "Hai que facer reformes pa tener credibilidá gubernamental y pa poder apurrir más cohexón y bienestar social. Nun creo que pensar económicamente seya conspirar socialmente", destacó.

Javier Fernández criticó que pa la derecha'l futuru "ye como'l destín" y remarcó que pa los socialistes "la política sustitúi al destín". "Nes nueses propuestes nun va aver grandes utopíes, sinón utopíes modestes con propuestes concretes y reales. Somos un partíu fuerte, y esa fuerza ye la fuerza d'Asturies. Vamos ganar", afirmó ente aplausos.

Amás, mientres el so discursu tuvo palabres d'aponderamientu pal lehendakari Patxi López, de el que dixo que "nun ye namás lehendakari sinón tamién un símbolu de la llucha pola llibertá". Igualmente, fixo referencia al presidente del Principáu, Vicente Álvarez Areces, y la so trayectoria. "Si güei Asturies, con toles dificultaes, ta meyor qu'otres comunidaes y podemos asitianos nel nuevu orde, debémos-ylo a un presidente que fixo camín de progresu", aseveró. Por ello, estimó “tolo que fixo por Asturies” y de la mesma dio-y les gracies "polo que por Asturies y España quedó inda por facer".