Preséntanse los sustitutos de Rafa Palacios y Javier Antuña

La conseyera de Bienestar Social y Vivienda, Noemí Martín, presentó a los dos nuevos miembros del so equipu, que van sustituyir a los miembros del Bloque por Asturies.

Trátase de l'actual direcutor de l'Axencia Asturiana de Discapacidá, Luis Miguel Romero, y a Marcos Cienfuegos que, el próximu 26 de xunetu, va asumir la dirección de l'Axencia Asturiana de Cooperación al Desarrollu.

 Noemí Martín, que compareció en rueda de prensa, faló del so "compromisu" y "esfuerzu" al incorporase a esta etapa de fin de llexislatura onde se plantegen l'oxetivu políticu de "rematar un programa que nel so día alcordamos cola FSA y que, no referente a esta Conseyería, busca blindar los servicios sociales, la política social n'Asturies nun contestu de crisis económica y d'amenorgamientu de los recursos públicos".

 Romero yá foi presentáu la pasada selmana nel Conseyu de Gobiernu. Pela so parte, el yá direutor de l'Axencia Asturiana pa la Discapacidá aseguró que "les persones con discapacidá tienen reconocíos munchos derechos pero tienen munches dificultaes pa exercitar con plenitú una bona parte d'ellos y que puean faelo ten de ser unu de los oxetivos de l'Axencia".  

Destacó tamién que'l retu fundamental de l'Axencia ye poner en marcha'l Plan d'Accesibilidá que yá ta "avanzáu" y nel que pudieron participar los coleutivos de discapacidá asturianos. Según él, "esta amplia participación dio unos resultaos granible que van dexar ellaborar un Plan importante, el primeru d'Asturies n'Accesibilidá, y que puede ser una referencia a nivel estatal".

Marcos Cienfuegos, que va ser nomáu la próxima selmana nel Conseyu de Gobiernu, destacó na presentación qu'ún de los grandes retos de la Política de Cooperación ye "llograr apangar les necesidaes de los países que menos tienen entá ye más nel actual contestu de crisis económica" y punxo como exemplu d'esa necesidá creciente'l fechu de que "dende principios de los años 90 aumentaron en 200.000 el númberu de persones que pasen fame nel mundu" y esti fechu pon de relevancia la importancia que pa los que menos tienen suponen "les polítiques de cooperación sobretodo en derechos básicos como l'accesu a l'alimentación, a la educación o la sanidá".