Los trabayadores de Venturo XXI abandonen el so encierru

Los trabayadores de Venturo XXI abandonaron l'encierru nel Conceyu de Samartín del Rei Aurelio güei a les 12.00 hores, anque anuncien que van siguir cola so reivindicación.

Van facelo coles mires de "reorientar" y "reforzar" les sos reivindicaciones que, según anunciaron, "nun van cesar hasta que recuperemos el nuesu puestu de trabayu".

Según informó la plantiya de la cartográfica, la decisión foi tomada ante les mires xeneraes tres la xunta caltenida'l pasáu martes col conseyeru d'Industria y Empléu, Graciano Torre.

Coles mesmes, convocaron la presencia de cuantos quieran averase al Consistoriu "pa demostrar que siguimos xuníos pola mesma causa y na mesma llucha", asina como pa "sofitar, reconocer l'esfuerzu y dar ánimos y fuerza a toos los compañeros qu'aguantaron mientres 61 díes un encierru dignu y xustu pero tamién bien duru en munches ocasiones", concluyeron.