UNA recuerda la baxa prioridá d’Asturies pa producir enerxía

UNA diz que'l determín d'Endesa de paralizar la construcción del ciclu combináu n'El Muselón “ye la consecuencia de planiar producir enerxía onde nun ye necesario”.

El voceru de Mediu Ambiente de la formación, Tino Fernández, destacó que “la decisión d'Endesa confirma qu’Asturies nun precisa producir más enerxía, tal como recueye’l mesmu Plan Enerxéticu Estatal, qu'establez la prioridá más baxa posible a Asturies pa producción enerxética, lo que fai inconcebible que'l gobiernu central y asturianu anecie n'enllenanos de ciclos combinaos, ignorando los sos propios encamientos”.

Tamién destacó que esta decisión xúnese a la d'Hidrocantábrico de paralizar el ciclu combináu que tenía planiáu instalar n'El Muselón. “Cada día faise más evidente el gran engañu que supón El Muselón, que namás va suponer la desapaición milagrosa de millones d'euros, un ataque bien duru al nuestru mediu ambiente y que va llevase hasta'l sable de les nueses sableres”, afirma.

Dende UNA llamenten que “quieran convertir a Asturies na pila de Madrid, que ye'l verdaderu furacu negru de la política enerxética yá que nun produz nin una mínima parte de la enerxía que consume, porque ye muncho más rentable utilizar la enerxía na xeneración de productos y servicios con mayor valor amestáu, que perder terrén industrial y asumir la contaminación de producir daqué que dexa tan poca riqueza, una vegada superada la fase de construcción, como ye la industria enerxética”.

Pa cabu, Tino Fernández refirióse a les declaraciones de Graciano Torre onde se venceya'l fracasu de la so política enerxética a la non construcción de la llinia Sama-Velilla ya indicó que “hasta les empreses dexen n'evidencia al Conseyeru, darréu qu'Asturies nun precisa mayor producción enerxética porque tien el so suministru totalmente garantizáu, anque Graciano Torre anecie en dicir lo contrario, y les meyorancies necesaria na nuestra rede llétrica nun tán venceyaes pa nada cola construcción de la llinia d'evacuación y tendríen que tar faciéndose yá”.