El Bloque acusa a IX de dar "un volantazu a la derecha"

El Bloque por Asturies (BA) caltién la so decisión d'abandonar la coalición y acusa a IX d'adoptar una decisión que supon "un volantazu a la derecha".

Asina lo treslladó l'ex direutor de l'Axencia Asturiana de Cooperación al Desrrollu, Rafael Palacios, en declaraciones a Europa Press, tres la xunta que'l Bloque caltuvo esti xueves colos representantes d'Izquierda Xunida.

Pa Palacios, la Llei d'Axuste qu'IX sofita supón "una deserción de la esquierda del Gobiernu d'Asturies", asina como una traición" a los votantes, yá que "fraya" los alcuerdos del programa electoral, según opinó.
 
Coles mesmes, Palacios esplicó que "nun puede haber un grupu parllamentariu que seya al empar Gobiernu y oposición". Por ello, va ser el diputáu Roberto Colunga'l que va defender les reivindicaciones del Bloque nel Parllamentu lo que queda de llexislatura, "tamos obligaos", aseguró.

Nesti sentíu, Rafael Palacios sorrayó'l compromisu del so partíu colos votantes que sofitaron el programa electoral presentáu. Asina, dixo que la so voluntá ye "siguir respondiendo a les persones que dieron l'enfotu en 2007" y que "foi traicionada" cola votación d'IX pa sofitar una midida "radicalmente en contra de lo que defendíamos".

Tamién señaló que BA va dar "llibertá" a los sos representantes nos conceyos pa caltener o non los grupos municipales en función de los alcuerdos nos conceyos.

A lo último, dende BA treslladaron la decisión de la Xunta Nacional de reestructurar la organización. D'esta manera, Rafael Palacios foi designáu como nuevu voceru y Pablo Fernández va ser el responsables de Relaciones Institucionales.