Día del Llibru Asturianu

El Bloque rompe con IU “pa entamar un proyeutu minoritariu”

|

IX confirma que l’aconceyamientu de güei foi pa frañar formalmente la coalición, “agora’l Bloque  quier impulsar un proyeutu débil, minoritariu y escluyente”, afirmen dende IX.

“Ye la so decisión", sostien el secretariu d'organización d'IX d'Asturies, Ángel González, pal que "a partir de güei ábrese un nueva etapa". Igualmente confirmó al traviés d'un comunicáu que la coalición IX-Verdes "caltiense". "Eso ye lo importante", sostien el dirixente d'Izquierda Xunida d'Asturies.

"IX y el Bloque teníen un alcuerdu políticu n'Asturies que'l Bloque frañó. Hai un únicu alcuerdu. Decidieron frañar la coalición y esto fraña en toa Asturies", señaló Ángel González.

El secretariu d'organización d'IX d'Asturies, sostien que "el Bloque opta por impulsar otru proyeutu políticu, como manifestaron estos díes, un proyeutu al marxe d'IX-Verdes". "Llamentamos qu'antepongan los sos intereses electorales y de partíu al interés xeneral de los asturianos", apuntilla González nel escritu.

D'esta miente, incide en qu'IX-Verdes tien "otres prioridaes", ente les que s'atopen "dar respuesta a los problemes de la xente y garantizar una xestión d'esquierdes a la crisis, protexendo a los más débiles y frenando les polítiques de dereches del PSOE nel Estáu".

"El frañamientu nun va tener nengún efeutu", afirmen dende IX, yá que entienden que "el Gobiernu va siguir articulando una política d'esquierdes n'Asturies y la Xunta Xeneral va siguir sosteniendo un alcuerdu que garantiza estabilidá política pa encarar la crisis dende la esquierda".

Ángel González señaló que "IX-Verdes va siguir siendo'l frenu de la política de dereches n'Asturies. Y eso ye lo qu'importa a la xente". "Frente a un proyeutu débil, minoritariu y escluyente que pretende impulsar el Bloque, IX-Verdes va siguir trabayando con un proyeutu fuerte, ampliu ya integrador de tola esquierda tresformadora y ecoloxista n'Asturies", concluyó.

Comentarios

Nun toi d'alcuerdu con González, si ye verdaderamente asina, los intereses electoralistes del Bloque, pondríense per una vez al serviciu de los asturianos. Y esi serviciu pasa irremediablemente pola formación d'una candidatura asturianista seria de cara al 2011.
Cuento con que ye lo que naguamos muncho. Tolo que nun seya eso, xuegos malabares.

Contador Estadistiques