El Principáu proyeuta amenorgar un 30% los costos de les empreses

|

El Principáu ta desenvolviendo un proyeutu p'algamar l'amenorgamientu nun 30% de les cargues alministratives, costos económicos que les empreses aguanten.

La conseyera d'Alministraciones Públiques y Vocera del Gobiernu, Ana Rosa Migoya, acompañada pol Direutor Xeneral de Modernización, Alberto Pérez Cueto, presentó güei'l proyeutu, que pretende entamar en 2012, nel cursu de La Granda 'Amenorgamientu de cargues alministratives y costos económicos a les empreses'.

Según esplicó la conseyera, la iniciativa va desendolcase sobre dos tipos d'actuaciones. La midida de les cargues alministratives, que va dexar midir l'esfuerzu económicu actual nos ámbitos d'estudiu escoyíos por parte de les empreses asturianes, y tamién valorar l'impactu de les midíes d'amenorgamientu que se planteguen.
  
Y la definición d'actuaciones d'amenorgamientu de cargues alministratives: diseñu d'aquelles midíes que faciliten una baxada de les cargues alministratives.
  
Esti modelo tien como finxu cimeru algamar datos oxetivos sobre l'impactu económicu de les cargues alministratives. Básase na encuesta direuta de les empreses, pente medies de valoración d'espertos nel ámbitu d'analís.
  
Según esplicó la conseyera, pártese del tiempu emplegáu na realización de les actividaes según lo qu'indiquen les empreses y la valoración d'espertos. Esi tiempu se cuantifica con un preciu/hora en función de perfil y añádense dellos costos a parte, lo que a lo cabero mos apurrirá'l valor de cargues alministratives.

Otres iniciatives
  
La conseyera ufiertó tamién datos sobre otra de les iniciatives poles que ta puxando'l Gobiernu d'Asturies y que se fai pa evitar que los ciudadanos y les empreses apurran documentos que yá s'atopen en poder l'Alministración.
  
Hasta'l momentu, el Gobiernu d'Asturies aprobó diversos resolvimientos polos que nos procedimientos tramitaos quítase la obligación de los ciudadanos d'apurrir los siguientes documentos: fotocopia del DNI/NIE y Certificáu d'empadronamientu; certificaos de topase al corriente nel cumplimientu de les obligaciones tributaries cola Facienda del Principáu d'Asturies y l'Axencia Estatal d'Alministración Tributaria (AEAT); certificáu de topase al corriente nel cumplimientu de les obligaciones cola Seguridá Social; certificación catastral y certificáu de grau de discapacidá.
  
Respeuto al usu d'Internet pa rellacionase cola Alministración autonómica, la conseyera destacó'l "gran esfuerzu inversor nestes nueves tecnoloxíes", pa que tanto Alministración como ciudadanía tean en condiciones de rellacionase de forma áxil y segura ente sigo.
  
Esta inversión asitió a Asturies como la primera de les comunidaes en tener servicios públicos on-line. L'informe añal sobre'l desendolque de la Sociedá de la Información n'España de la Fundación Orange (y-España 2010), asitia por cuartu añu siguíu a l'Alministración asturiana como cabezalera nacional, con una diferencia de 23 puntos percima de la media del estáu.

Contador Estadistiques