L’Arxentina reconoz el matrimoniu ente persones del mesmu sexu

El plenu del Senáu arxentín decidió, por 33 votos a favor, 27 en contra y 3 astenciones, sancionar la llei que permite’l matrimoniu ente persones del mesmu sexu.

La llei, que yá fora aprobada'l 5 de mayu pola Cámara de Diputaos, tuvo una fuerte oposición de los grupos relixosos y los sectores conservadores, que celebraron delles concentraciones en Buenos Aires y en tol país. Mientres, el mundu de la cultura y la propia presidenta, Cristina Fernández de Kirchner, amosaron el so sofitu a la llei.

Con too, nel país yá hai nueve pareyes del mesmu sexu casaes, tres que n’avientu se celebrara la primer boda ente dos homes por mor d’una dura batalla nos tribunales y que dellos xueces ordenaren a los rexistros civiles inscribir los sos correspondientes matrimonios.

L’Arxentina conviértese asina nel primer país d’América Llatina en permitir el matrimoniu ente persones del mesmu sexu, anque nel territoriu de Méxicu Distritu Federal si ésiste la igualdá llegal ente heterosexuales y gais.

Anguaño, tres sumase L’Arxentina, hai diez estaos nel mundu que permiten el matrimoniu de gais y lesbianes; Holanda, Bélxica, España, Canadá, Sudáfrica, Noruega, Suecia, Portugal ya Islandia. Mientres que nos EEXX ta permitió nos estaos de Massachusetts, Connecticut, Iowa, Vermont, New Hampshire y Washington D.C.