El Comité Electoral tamién refuga a Cascos

Los integrantes del Comité Electoral del PP d'Asturies alcordaron, por unanimidá, refugar la hipotética candidatura d’Álvarez-Cascos a la Presidencia del Principáu.

L’escritu de refugu ta robláu pol Presidente Comité Electoral Rexonal d'Asturies, Agustín Iglesias Caunedo; el Secretariu del Comité Electoral Rexonal d'Asturies, Eduardo Junquera Rodríguez y polos vocales: Benjamín Bilaboa Gutiérrez; Alejandro Arias Torres; Salvador Garriga Polledo; Arancha Arechaga Braña; Begoña Gancedo Crespo; Álvaro Fernández Martínez y Ana Teresa Fernández García.

Dende'l Comité sostienen que dende que s'entamó a falar d'esta posibilidá, "desenvolvióse toa una actividá por persones de la so redolada empobinada a poner en cuestión a los órganos de gobiernu del PP tantu a nivel local como rexonal. Tou ello con un riesgu evidente de rotura interna que debilita les posibilidaes electorales del nuesu partíu".
 
Dende'l PP afirmen que "el candidatu del Partíu Popular a les próximes elecciones autonómiques tendrá de ser daquién que, de primeres, xuna al conxuntu de la nuesa organización; non que la dixebre”.

Y señalen que llegáu'l momentu'l Comité Electoral va sofitar aquella candidatura que cumpla esa condición y cunte col sofitu de los órganos del PP d'Asturies.

Santamaría diz que nun se faló d’el tema
 
La vocera del PP nel Congresu de los Diputaos, Soraya Sáenz de Santamaría, aseguró esti xueves que la dirección nacional del so partíu tuvo "metida" nel Alderique sobre l'estáu de la Nación y les candidatures pa les eleiciones autonómiques, ente elles la d'Asturies, van decidise "cuando toque".
 
Nuna entrevista a Onda Cero recoyíes per Europa Press, Santamaría dixo enterase na prensa sobre'l refugu del PP asturianu a una posible candidatura de Francisco Álvarez Cascos, y dixo que les candidatures "van llegar nel so momentu tanto n'Asturies como nel restu de comunidaes. "La direición nacional entá nun ta neso y va tar cuando toque", afitó.
  
Preguntáron-y si'l líder nacional del so partíu, Mariano Rajoy, axuntóse con Álvarez-Cascos, la vocera parllamentaria manifestó desconocer tala situación mentantu aneció en que "les coses tien el so tiempu en cada sitiu" y "cada ún procura da-y el ritmu que tien". "Lo d'ayeri enteréme pola prensa, tampoco-y presté muncha atención. Había que tar más pendiente del Alderique", añadió.
  
De toes formes, pidió que'l cabezaleru  de la so formación nel país seya "un bon candidatu" que sepa llevar el proyeutu del so partíu y ufierte alternativa. "decidiránlo los órganos del partíu cuando correspuenda y entós voi opinar yo", finó.