Areces diz que yá alertara de los problemes del PP con Cascos

Areces señaló que venía alvirtiendo de los problemes internos y les contradicciones del PP cuando yera preguntáu por Cascos, pero considera que son problemes a superar nel PP.

"Creo que cuando un partíu tien problemes internos, siempres actué con muncho respetu pa eses situaciones. Y non tratu d'interferir en nenguna decisión que-yos correspuende a ellos. Pero sí manifestar que cuando me fixeron esa entruga repitíes vegaes nos últimos meses, siempres dixi que'l problema teníalu’l PP", señaló..

Areces realizó estes manifestaciones a los periodistes en Xixón momentos antes de participar na inauguración de la Galería de Arte Adriana Suárez y tres conocer el comunicáu de la cúpula del PP asturianu nel que refugaba una supuesta candidatura del ex ministru a la presidencia del Gobiernu asturianu.
 
Entá asina, el xefe del executivu asturianu manifestó que nun-y gusta entrar en cuestiones d'otros partíos. "Yo nunca aprobé qu'otros partíos actúen manifestando les sos opiniones sobre'l PSOE y sobre problemes internos de los partíos. Correspuénde-yos a ellos superalo. Yo creo que lo que se pon de manifiestu una vegada más ye que'l PSOE ye un elementu vertebrador de la sociedá asturiana y que'l so gran capital políticu tienlo tamién na so cohexón interna y na unidá d'actuación. Sobremanera, lo que nos xune son los intereses d'Asturies".

Nesti sentíu, Areces señaló que-y gusta falar de lo que-y correspuende, como Gobiernu. "Los socialistes vamos mirar siempres y vamos siguir mirando pol interés xeneral d'Asturies. Somos un partíu xuníu, que creo que ye un gran valor nos momentos que vivimos, un partíu bien cohexonado, onde creo que fundamentalmente les coses que nos xunen son les idees que compartimos, l'interés por sacar alantre Asturies, sobremanera en momentos difíciles, y vencer los problemes que tenemos", concluyó.