TPA emite torneos de bolos dende Siero y Cangas

La segunda canal de TPA, A8, emite güei en direuto’l V Memorial Lisardo García Villa dende La Pola. Mientres qu’A7 tresmite’l domingu la competición d’El Carmen de Cangas.

TPA 2 (A8) emite a les 17:30, el V Memorial Lisardo García Villa, ‘El Abuelo’ en direuto dende la bolera del parque Alfonso X El Sabiu de La Pola Siero. Sergio Fuente, acompañáu nos comentarios pol ex xugador Lucas Blanco, va narrar la partida de cuatriada. La tresmisión va entamar a les 17:30 col previu de la final que va enfrentar a Iván, de la peña El Piles, y Pedro, de la peña El Chalupu.

El domingu 18 de xunetu la cita va ser na primer canal de TPA, A7, na bolera del Institutu de Cangas, cola tresmisión del VIII Tornéu del Carmen de pasabolu vaqueiru. Juan Diego Pérez, acompañáu nos comentarios técnicos por Manuel Ausente, va comentar pa los espectadores tolos detalles de la xornada dende les 11:30 hasta les 13:00.

La cadena autonómica va cuntar con un equipu técnicu semeyante al utilizáu n'otros deportes de máxima categoría: una unidá móvil con seis cámares y 16 profesionales, ente redactores, técnicos y realizadores, que se van encargar del siguimientu de dambes competiciones.

Les finales del Memorial El Abuelo y del VIII Tornéu del Carmen de pasabolu vaqueiru van ufiertase tamién per Internet pa tou'l mundu al traviés de www.rtpa.es.