Rafa Palacios: “Ye un momentu duru y complicáu”

Rafael Palacios afirma sobre la so dimisión que ye un momentu duru y complicáu, “pero la dignidá y la coherencia tienen que tar presentes n’acción política”.

El yá ex direutor de l’Axencia Asturiana de Cooperación al Desarrollu y miembru de la Direición Nacional del Bloque por Asturies vien de mandar una carta a los medios de comunicación tres que güei’l BOPA publique’l so cese, que presentara a petición propia’l pasáu llunes.

“Ye un momentu duru y complicáu, pero pienso que la dignidá, la coherencia y el compromisu cola xusticia social son valores que tienen que tar presentes n’acción política pa dignificala”, afirma’l políticu nacionalista.

Palacios diz qu’estos años n’Axencia Asturiana de Cooperación al Dearrollu valiéron-y p’aprender a poner enriba de cualesquier cosa la defensa de los derechos humanos y la llucha por un mundu en paz.

“Foron años que tuvieron enllenos d’esperances, d’ilusión, d’utopía, de victories y derrotes, de millones d’errores y dalgún aciertu, pero sobre too enseñáronme que la única llucha que val, ye la llucha de cada día, ye’l compromisu, la llama que mantenéis encendida día a día”, afirma’l miembru del Bloque.

Pa finar, Palacios agradez el trabayu de la xente que tuvo con él n’Axencia de Cooperación al Desarrollu y afirma qu’enxamás van dexar d’alcontralu na llucha de cada día “por un mundu y por una Asturies con xusticia social”.