El Constitucional refuga suspender la llei del albuertu

El Constitucional refugó esti miércoles suspender l'aplicación de la nueva Llei de Salú Sexual y Reproductiva ya Interrupción Voluntaria del Embaranzu conforme pidía'l Partíu Popular.

Poro la norma va siguir a valiendo mientres los maxistraos resuelvan sobre los recursos d'inconstitucionalidá presentaos escontra dellos de los sos preceptos.
  
El Constitucional estudió esta cuestión depués de recibir les quexes al respective del Congresu, el Senáu y el Gobiernu, y cuando la norma cumple los sos primeros diez díes de vixencia. El resolvimientu contó con cuatro votos particulares.
  
El pasáu 30 de xunu'l TC almitió a trámite los recursos interpuestos contra la llei pol Gobiernu de Navarra y el Partíu Popular y dio un plazu de tres díes a les partes pa presentar allegamientos sobre una posible suspensión de la entrada a valir de la norma, que taba prevista pal 5 de xunetu.
  
Nel mesmu plazu, la Mesa del Congresu unvió una respuesta automática" camentando la posibilidá de presentar quexes conforme a les fontes consultaes per Europa Press, ente que l'Abogacía del Estáu, de parte del Gobiernu, entamó un escritu nel qu'argumentaba que'l Constitucional nun tien competencies pa suspender la entrada a valir d'una norma qu'aprobó'l Parlamentu.
  
Nel mesmu sentíu pronuncióse la vocera del Conseyu Xeneral del Poder Xudicial (CGPJ), Gabriela Bravo, el qu'aseguró que l'almisión a trámite d'un recursu d'inconstitucionalidá "nun tien efectos suspensivos" polo qu'al so xuiciu, "lo normal" ye que se cumpliera la llei que yá ta a valir.
  
La nueva llei, qu'entró a valir el 5 de xunetu, 25 aniversariu de la Llei de Despenalización del Albuertu en Determinaos Supuestos vixente hasta'l momentu, lliberaliza l'albuertu hasta la selmana 14 de xestación, establez un comité clínicu pa evaluar los albuertos por problemes nel fetu a partir de la selmana 22 y dexa que les menores de 16 y 17 años puedan albortar ensin consentimientu paternu.