El Senáu aprueba l'usu de les llingües oficiales

El Senáu aprobó l'ampliación del usu de les llingües. El PSOE diz que quieren que naide quede escluyíu dientro d’España. Sicasí, asturianu y aragonés queden fuera por nun ser oficiales.

Agora, el Reglamentu del Senáu va dexar que los senadores puean presentar toa clase d'escritos ya iniciatives en catalán (catalán y valencianu, señala'l Reglamentu), vascu y y gallegu, amás d’utilizar estes llingües na defensa y alderique de les mociones nos plenos.

La reforma va ser ratificada pol plenu del  próximu miércoles y va entrar en vigor l'añu que vien, los defensores de la propuesta afiten que’l presupuestu de la iniciativa nun va facer aumentar el presupuestu de la Cámara.

El PP, que votó en contra, acusó a los socialistes de camudar de posición colos años y d'aceptar esta propuesta por debilidá énte los partíos nacionalistes y la presión del PSC. La senadora conservadora Rosa Vindel camentó que la iniciativa ye anticonstitucional, anque’l so partíu nun tien pensáu denunciar el Reglamentu nel Altu Tribunal.

Pa la senadora, la midida quier imponer l’interés d’unos pocos sobre’l xeneral, afirmando que la Constitución diz les zones xeográfiques nes que les llingües son cooficiales, mientres qu’en tol Estáu l'idioma oficial y únicu ye'l castellán.

Dende’l PSOE, José Ignacio Pérez Sáenz aseguró que l'oxetivu del so partíu ye "qu'España integre tolos elementos culturales y identitarios que conviven nella, que nada nin naide quedu escluyíu dientro d'España".
 
Mientres, dende Estesa Catalana defendieron l’aprobación como un actu d’españolidá, “son tamién llingües españoles”, afirmó Carles Bonet. Dende CIU, Jordi Cases solliñó que millones de ciudadanos falen con normalidá otra llingua que nun ye’l castellán “y esto tien qu’espeyase nel Senáu”.

Pa finar, el voceru del PNV, Iñaki Anasagasti, dixo que l’aprobación del Reglamentu yera un alderique políticu “ente los qu’acepten la diversidá y los que nun lo faen”.