Les Xuntes Locales del PP d'Uviéu, Xixón, Avilés y Mieres, acordies cola direición n'Asturies y Nueves Xeneraciones, refugaron una hipotética candidatura d’Álvarez-Cascos.

El PP asturianu sostien qu'hasta agora solamente pronunciáronse les fontes del ex ministru y siempre en tonu “despreciativu haza quienes celebraron la so posible vuelta a la política y amosaron la so disposición a collaborar ensin más condición que la de trabayar pola victoria respetando los nuesos Estatutos y a les persones que llexítimamente lleven la responsabilidá de dirixir el Partíu".

"Tamién lleímos qu'él nun ta pa ufiertase sinón qu'había que pidi-ylu. Con eses, pidímoslo y asina lo manifestamos a la Direición Nacional del Partíu. Y cuando se-y pidió, entós dixeron qu'había que dir buscalu a casa, despreciando a los que dieron el so sofitu", señala la direición del partíu.

"Lo más grave -sigue'l PP- ye que, col so impulsu, un grupu d'amigos personales de Cascos, que nel PP malapenes se representen a sigo mesmos, envalentonaron y empecipiaron una dinámica d’autohomenaxes que tanto nos recuerda al procesu qu'acabó cola creación de URAS y la rotura del PP d'Asturies fai 12 años, de la qu'inda tán encarnando les feríes".

A última hora, la hipotética candidatura de Cascos, según la direición del PP asturianu "ta sirviendo puramente pa intentar dixebrar al PP d'Asturies, otra vegada con riesgu de rotura interna. Esi grupu d'amigos de Cascos que perdieron tolos Congresos Locales tán anunciando con too descaru la futura lliquidación de quienes llexítima y democráticamente los ganaron".

Poro, los'populares' asturianos entienden que la responsabilidá de Cascos nesti asuntu esiste porque la so "midida actitú ampara y promueve esa intriga. Mal empiezu ye ésti pa una candidatura supuestamente ganadora, y d’eso habría enforma que falar, nes próximes eleiciones autonómiques".
 
"Asturies volvería a les andaes recordando la cainita confrontación Marqués-Cascos qu'entós nos llevó a la ruina político y electoral por non saber responder al enfotu que la sociedá depositó en nós".

Nesti sentíu, el PP afirma que precisa un candidatu que sume, non que reste; que respete los Estatutos del partíu y les resultaos de los Congresos y non al contrariu.

"Precisamos dirixentes que confronten cola política socialista y que defendan el nuesu proyetu de partíu. Y nun nos valen los que vienen a hostigar a quién lo facemos dende va munchos años, ganando o non eleiciones, pero sufriendo les consecuencies personales de tar en primer llinia de fueu mientres otros tán cómodamente contemplándolo", señalen.