El Principáu aprobó la cesión de los cargos del Bloque por Asturies tres anunciar la formación la so salida del Executivu pol so refugu a la baxada del sueldu de los funcionarios.

D'esta miente, el Conseyu de Gobiernu alcordó la cesión de Rafael Palacios al mandu de la Axencia Asturiana de Cooperación al Desenvolvimientu, y de Javier Antuña como direutor de l'Axencia Asturiana pa la Discapacidá.
 
Coles mesmes, aprobóse'l nomamientu de Luis Miguel Fernández Romero como responsable de l'Axencia Asturiana pa la Discapacidá. El nuevu director nació n'Avilés el 17 de noviembre de 1969 y ye Graduáu Social. Na actualidá trabaya nel sector priváu y nel gabinete del Grupu Parllamentariu d'IX na Xunta. Na anterior llexislatura foi Direutor de l'Axencia Asturiana d'Emigración. Tamién foi conceyal en Ḷḷena, onde ocupó la vicealcaldía ente 1999 y 2002.
 
Pela contra,  nun va ser hasta la próxima selmana cuando se faiga oficial el nomamientu del sustitutu de Palacios por retrasos nel procesu alministrativu. Va ser Marcos Cienfuegos el que asuma la responsabilidá de les polítiques de Cooperación.

Cienfuegos nació en Figareo (Mieres), el 19 d'abril de 1975. Ye conceyal en Mieres, onde ocupó xeres de gobiernu como conceyal de Mediu Ambiente na anterior llexislatura. Ye miembru de la Executiva d'IX de Mieres y del Conseyu Políticu d'IX d'Asturies. Ye docente de carpintería nun centru de formación ocupacional. Participó nel movimientu asociativu xuvenil de les Cuenques Mineres y nel sindicatu CCOO.

Conseyu "con normalidá"

La conseyera d'Alministraciones Públiques y Vocera del Gobiernu, Ana Rosa Migoya, indicó que nesta sesión del Conseyu trabayóse con "normalidá" ensin mentase l'arrenunciu del presidente del Principáu, Vicente Álvarez Areces, a presentase a la reelección nos comicios de 2011.

Migoya remarcó que al Gobiernu "quéden-y inda munchos meses de trabayu primero que concluya la llexislatura y eso ye lo que tenemos que facer, siguir trabayando col mesmu enfotu ya intentar dar solución a los problemes d'Asturies", dixo afirmando que eso ye lo que tresmite'l presidente.

Per otra parte, la vocera del Executivu refugó analizar el pidimientu del Bloque por Asturies de pasase al Grupu Mistu na Xunta Xeneral. "El Gobiernu nun analizó esa cuestión porque nin-y correspuende nin-y pertenez. Correspuende a otra fuerza política y tolo que tenga que ver col ámbitu parllamentariu pertenez a la Xunta Xeneral del Principáu", argumentó.