Areces diz que Fernández ye un candidatu "escelente" y va sofitalu

Areces manifestó esti martes que "anque nun ye daqué oficial ye un secretu a voces que'l secretariu de la FSA, Javier Fernández, va ser el candidatu a les próximes eleiciones".

Areces foi entrevistáu güei en 'La Ventana' de la SER depués de que'l pasáu xueves anunciara que nun volverá ser candidatu nes próximes eleiciones de 2011.
 
"Fernández ye una persona bien intelixente, con esperiencia parllamentaria, y un escelente candidatu, asina que voi faer tou lo que tea nes mios manos pa sofitalu y el PSOE gane les eleiciones porque Asturies precísalo", dixo Areces.

El presidente asturianu dixo amás que al PP fálta-yos la elegancia de saber tar nuna posición oxetiva y educada y recordó qu'a Ovidio Sánchez, el presidente del PP d'Asturies, "si que lu refugaron los ciudadanos nes urnes".

"Sánchez nun va tener el gustu de ganame nes urnes porque yo voi voluntariamente. Llevo tres elecciones ganándo. Ye la pequeña rocea que-yos queda y nun quieren almitilo", dixo Areces, en respuesta a les crítiques del PP.

Aseguró que bona parte de los oxetivos que se plantegara consiguiéronse y consideró qu'esti "yera'l momentu afechu p'anunciar la so decisión". Sicasí manifestó que "inda queda enforma por faer" a pesar de qu'Asturies supo crear un nuevu texíu económico y empresarial bien fortalecíu.

En materia d'infraestructures manifestó que "nun cree que peligre" l'Autovía del Cantábricu, anque si afirmó que "pue que los tramos que queden por rematar retrásense". "Voi Tratar que'l Gobiernu priorícelu, porque les obres tán bien avanzaes y yá son obres irreversibles", dixo Areces, que resaltó amás la llegada de l'alta velocidá.

Defendió la xestión de José Luis Rodríguez Zapatero y manifestó que al presidente del Gobiernu entá-y queda llexislatura. "Yo tomé esta decisión porque se abre'l calendariu de cara a les eleiciones, pero Zapatero nun ta nesa situación", dixo Areces, en respuesta a les entrugues de la presentadora.

Sobre'l so futuru personal, Álvarez Areces indicó que-y gustaría gociar de bona salú y siguir coles mesmes fuerces y ganes". Dixo amás que nun hai porque tar nel poder pa siguir faciendo coses útiles.