Los asturianos escueyen a David Villa y Fernando Alonso pa dir de cañes

El pilotu Fernando Alonso y el futbolista David Villa fueron escoyíos polos asturianos como los meyores acompañantes pa tomar unes cerveces.

L'actriz Paula Echevarría, el cantante Melendi y l'actor Arturo Fernández asítiense tamién nos primeros llugares de la encuesta '¿Con quién diríes de cañes?', qu'entama Cerveceros d'España col enfotu de conocer quién son los personaxes más populares d'Asturies colos que mos prestaría compartir un vezu tan enraigonáu como dir de cañes.
  
Según la encuesta los asturianos decántiense por deportistes (48 por cientu) pa tomar unes cerveces, siguíos de los cantantes (43 por cientu); de siguío los actores son citaos por un 27 por cientu de los encuestaos.
  
En comparanza coles resultancies de 2009, el futbolista de la selección española, David Villa, "xube como la espluma" nel ranking, pasando del quintu puestu al segundu d'una llista na que s'estrena Paula Echevarría en tercer llugar. Tamién ye novedá la presencia del cantante Melendi, que s'asitia tres de la muyer de David Bustamante, el que foi escoyíu como'l personaxe preferíu polos españoles pa dir de cañes.
  
Fernando Alonso ye l'únicu que caltién la so posición siendo escoyíu nuevamente como l'asturianu preferíu pa compartir esta bébora.
  
Tocantes a les baxaes, Arturo Fernández, pasa del tercer al quintu llugar y la Princesa d'Asturies, Letizia Ortiz, que s'asitiaba en segunda posición en 2009 nun s'atopa nesta edición ente los preferíos pa los asturianos pa dir de cañes, al igual qu'asocede col cantante, Víctor Manuel.