UNA califica de desproporcionada l’actuación de los antidisturbios

UNA califica de “desproporcionada y violenta” l’actuación de los antidisturbios na inauguración de la Selmana Negra y aseguren que la detenida va pagar l'enfadu d'Areces.

Daniel Fernández, miembru de la executiva nacional y presente na llegada del tren negru señaló que "en realidá'l problema ye que'l Sr Areces nun caltién recibir nin siquiera una mínima parte del descontentu de trabayadores que ven pesllar les sos fábriques ensin motivos y vergonzosamente subvencionaes, de los paraos y de los funcionarios que ven recortaos los sos sueldos, y too ello ensin tomar una midida de caláu contra los que provocaren la crisis". Amás, afirma qu’en nengún momentu hubo intención d'agredir al Presidente del Principáu".

Los militantes d’UNA que tuvieron presentes nes protestes convocaes a la llegada del Tren Negru, afirmen qu'una vegada que coló Areces, entamaron a toletazos colos presentes na protesta, “provocando mancadures y torgando atender a un manifestante que careció d'un ataque epilépticu”.

El miembru de la executiva d'UNA indicó que "otru militante de la organización que taba al llau de la muyer detenida y que grabó dicha detención, aseguró que'l contactu físicu ente la muyer detenida y el Presidente del Principáu, foi por mor de los emburriones de la xente que taba protestando, y en nengún momentu a un intentu d'agresión, y que de toes formes, ye una mera sida pa face-y pagar l'evidente enfadu de Tini Areces pol recibimientu de la ciudá de la que foi Alcalde."

Dende UNA esixen la retirada de tolos cargos, “porque nun puede inventase una agresión pa facer pagar a una persona tola rabia del que recibe una protesta tan dura como la d'ayeri, pero qu'en tou casu nun buscaba agredir a naide, porquelo único que queríemos yera qu'escuchare a la ciudadanía d’Asturies y Xixón, que-y dolió más que cualquier agresión física" concluyó.