UNA diz que les midíes d'axuste certifiquen “l'engañu"

UNA diz que l'aprobación de les midíes oficializa'l fechu de que los asturianos los que lleven la peor parte de la crisis. Al empar, diz que ye necesaria una alternativa a PSOE-IU y PP.

El voceru de la Executiva d'UNA afirma que’l recorte aprobáu ye un ataque direutu a los derechos sociales, “que se supón que se diben a salvaguardar, lo que ye más sagrino inda cuando provién de l'autodenominada esquierda plural”.

Zapico entrugóse ónde taben les afirmaciones d’Areces nes qu'aseguraba qu'Asturies soportaba meyor les consecuencies de la crisis, “ónde queda la defensa infrayable de los derechos de los trabayadores y la mano dura colos que provocaren esta crisis”. Coles mesmes, afirmó que pa UNA lo que queda ye un enorme y doliosu engañu, “nel que va ser la mayoría social la que tenga que cargar col costu de la crisis".

El voceru d’UNA dixo que la so formación considera que los “tibios cambeos” que s'apautaren ente PSOE-IU son un “maquillaxe que malpenes tapez la verdadera cara del recorte”.

Según el voceru d'UNA, nun se revisó la fiscalidá en pos d'una progresividá que de verdá faiga que tol mundu apurra en función de lo que gana, nun se revisó la estructura de l'alministración pa recortar gastos, y nel senu del Gobiernu nun se replantegaron les inversiones n'infraestructures.

Zapico finó pidiendo que la parte de la sociedá asturiana que reclama una respuesta social a la crisis, que comparte sensibilidaes n'otros temes básicos como'l medioambiente, respetu a la cultura y llingua y la necesidá de replantegar l'encaxe d'Asturies nel Estáu, tien de trabayar conjuntamente pa crear un tercer espaciu na política asturiana.

“Un Espaciu Políticu Asturianu, basáu en planteamientos de defensa de la xusticia social, l'ecoloxismu, la defensa de los colectivos más desprotexíos o discriminaos y que suponga una alternativa n'Asturies y dende Asturies, al modelu del PSOE-IX y del PP", solliñó pa finar.