Sánchez diz que l'arrenunciu d'Areces ye "una destitución tapada"

Ovidio Sánchez señaló que l'anunciu d'Areces de nun presentase como candidatu del PSOE a les próximes eleiciones, ye "una destitución tapada" pola so pésima xestión.

Ante la decisión d'Areces, Ovidio Sánchez considera que "nun hai nenguna sorpresa". "Nun ye cierto que non se vaya a presentar, lo que pasa ye que lu echaron y va meses que lo dixeron", dixo tres un actu en Tapia .

El presidente del PP asturianu sostién que dende va tiempu Areces sabía "que'l partíu nun contaba con él". Amás, afitó que "nengún asturianu s'estraña porque diz que la xestión d'Areces foi "bien mala p'Asturies".
  
"Lóxicamente'l so partíu camentó por quitalu, porque ve qu'empezó con 24 escaños, na siguiente llogró 22 y agora 21, nun camín absolutamente empinau pa baxo,  ente que'l PP empezó con 15, depués tuvo 19 y agora 20", sorrayó añadiendo que "rescampla que'l PP va ganar les próximes elecciones".
  
Y ye que pa Ovidio Sánchez la comparecencia de Vicente Álvarez Areces ye una forma "de vistir una destitución" que casi se fixo oficial meses atrás".
  
Tocantes a les implicaciones que la decisión d'Areces pueda tener pal PP de cara a les próximes elecciones autonómiques, Sánchez solo dixo que considera que ye "indiferente". "Yera un home que taba perdiendo electoráu a maza; de fechu yo ganélu nel Área Central d'Asturies, onde'l tenía mayor presencia".
  
Coles mesmes, el presidente del PP asturianu sostién que la xestión del xefe del Gobiernu asturianu foi "pésima". "Nun fai falta que lo diga'l PP, dizlo'l PSOE porque lu quita, lo que quier dicir que lo fixo bien mal", sorrayó.
  
"A naide-y entra na cabeza que si lo fixo bien lu quite'l so partíu. Sedría absurdo, naide tira piedres sobre'l so teyáu. Si lu quíten ye porque lo fixo bien mal", finó Sánchez.