Aprueben la contención del gastu colos votos de PSOE ya IX

La Xunta Xeneral aprobó colos 24 votos a favor de PSOE ya IX la Llei d'Axuste, a pesar del refugu de los 20 diputaos del PP y del diputáu del Bloque por Asturies.

L'alderique empecipióse de la que decenes de representantes sindicales concentrábense frente al palaciu parllamentariu p'amosar la so oposición a les midíes d'axuste, y especialmente contra la baxada de los xornales de los emplegaos públicos.

El conseyeru d'Economía y Facienda del Principáu, Jaime Rabanal, foi l'encargáu de presentar el proyeutu de llei en nome del Conseyu de Gobiernu ya aneció na necesidá d'aplicación de les midíes pa garantizar inversiones de calter estratéxicu, los servicios públicos de calidá y les polítiques sociales nun contestu de crisis.
  
Asina,prometió una mayor eficiencia nel gastu públicu y axustes presupuestarios, de la que defendió como necesaries unes reformes fiscales que "reforcen la progresividad de los impuestos, parten los costos de la crisis y facer recayer parte del axuste sobre les rentes más altes". La previsión del Gobiernu ye qu'estes midíes van dexar una crecía de la recaudación d'unos 50 millones d'euros añales.
  
No que cinca al baxón salarial de los emplegaos públicos, Rabanal aseguró que l'amenorgamientu ye "necesariu" y "igualáu". "L'esfuerzu a realizar polos emplegaos públicos supón un aforru pa les arques públiques d'unos 40 millones d'euros añales", indicó.
  
D'esta mena, el conseyeru aneció na urxencia de llevar a cabu diches midíes pa favorecer l'equilibriu de les finances públiques. Rabanal reconoció que son soluciones "difíciles" pero "necesaries" pa reforzar sostenibilidá de los servicios públicos y l'inversión pública que sofite la salida de la crisis. "Nun tomar estes midíes agora sedría irresponsable yá que supondría tener que tomales nun futuru non mui alloñáu y de xuru d'una manera desordenada ya inxusta".
 
REFUGUES LES ENMIENDES DEL PP
  
La diputada del PP Alejandra Cuétara foi la encargada de defender en bloque les enmiendes parciales qu'acutó'l so grupu pal so alderique nel plenu y que fueron refugaes colos votos de PSOE ya IX y l'astención del diputáu del Bloque por Asturies.
  
Cuétara afirmó que'l proyectu de Llei nun se centra na contención del gastu sinón en "esixir mayor esfuerzu a emplegaos públicos y ciudadanos pa siguir gastando". "Los ciudadanos son les víctimes de les sos reformes fiscales", sorrayó resaltando que nel IRPF "nun hai ricos, esos tán n'otra parte del sistema tributariu". "Si los ricos son los que cobren más de 90.000 euros, porqué los xenera'l Principáu a golpe de chequera a los altos cargos d'empreses y entes públicos", dixo-yos la diputada del PP.
  
Encamentó al Gobiernu asturianu a que faiga "daqué polos probes y les clases medies como fixo Madrid y Valencia, qu'amenorgaron los tipos nos que ta la mayoría de la población". Pa la diputada, la xubida d'impuestos por considerar que van estropiar al consumu y van torgar la salida de la crisis. "Traiga un plan de reestructuración del sector públicu pa nun doblar organigrames d'altos cargos y desfacer l'alministración paralela", esixó a Rabanal,  de la qu'afitó que dende'l Principáu "niéguense a meter tisoria porque tienen compromisos y por eso treslladen l'axuste a los ciudadanos y los emplegaos públicos que viven d'un sueldu".
  
Cuétara foi retrucada pol diputáu d'IU Jesús Iglesias, el qu'espera que les reformes fiscales nun seyan coxunturales sinón duraderes pa caltener l'avance y garantizar el caltenimientu a les polítiques sociales y los servicios públicos. Por ello, criticó a la diputada del PP por fomentar actitúes insolidaries y animar a la fuga de capitales.
  
Iglesias dixo qu'al PP nun-y tembló'l pulsu" p'aplicar el decretu nos territorios que gobierna ya tamién en dir más allá y llantalo a los trabayadores que nun taben afectaos. A lo último, afitó qu'IX quixera que nun se tocaren los xornales de los emplegaos públicos, pero "siquier" les midíes adoptaes dexen, al so xuiciu, un proyectu d'axuste más social y solidariu que n'otres comunidaes.
  
Nesti sen, Cuétara reprochó a IX qu'acepte midíes que "perxudiquen a los ciudadanos y nun van meyorar la situación d'Asturies" namás pa poder "siguir nel Gobiernu". "El modelu fiscal del que tán tan arguyosos va penalizar vivir y trabayar n'Asturies", dixo.
  
Per parte del PSOE intervieno'l diputáu Álvaro Álvarez, el que xustificó'l proyectu de llei nun marcu de crisis mundial, na que'l PP "nun contribuyó" a defender la solvencia d'España. Coles mesmes, afitó que tolos ciudadanos son víctima de la especulación financiera y toos tienen que ser responsables pa salir de la crisis y caltener el sistema. Asina, espera que con esta llei "ameyore la situación presupuestaria del Principáu pa garantizar los servicios públicos fundamentales".