Asturies, tercer CCAA que menos siguió a España

El partíu de la Seleición Española tuvo una cuota de pantalla n’Asturies del 79,4%, siendo la tercer comunidá autónoma onde menos siguimientu tuvo ‘La Roja’.

Tres el País Vascu (73,2%) y Cataluña (73,9%), Asturies ye la CCAA con menos espectadores viendo’l partíu d’España nel Mundial de Sudáfrica. Mientres qu’Andalucia (84,9%), Murcia (84,2%) y Valencia (84,1%) foron les que más siguieron a la ‘La Roja’.

Sicasí, el mayor porcentaxe llévenlu les comunidaes de Castiella y Lleón, Estremadura, Cantabria, La Rioxa y les ciudaes autónomes de Ceuta y Melilla, col 86,5%. Estes comunidaes computen nos estudios d’audiencies como ‘restu’ al nun cuntar con abondo númberu d’audimetros.

Más audiencia n’Alemaña que n’España

En tol Estáu, l’audiencia del España-Alemaña foi de 14.007.000 millones d’espectadores y 81,5% de cuota de pantalla na suma de les tres cadenes que trasmitieron el partíu. En Telecinco tuvo una cuota del 77,3%, en C+Liga del 2,5%y en C+ de 1,7%.

Mientres, n’Alemaña’l partíu tuvo una audiencia de 31,1 millones, ye dicir, un 83,2% de los alemanes taba viendo a la so seleición al traviés de la televisión pública, ARD. Los datos del partíu n’Alemaña suponen un 1,7% más d’audiencia que la suma de les tres televisiones españoles qu’ufrieron el partíu.

Ésitu en toa Europa

L’alcuentru de semifinales del Mundial 2010 tamién tuvo importantes audiencias en toa Europa. En Francia, el 49% de los espectadores siguió’l partíu pola privada TF1, nel Reinu Xuníu, el 41,8% de l’audiencia taba viendo BBC1, mientres que 777.000 persones lo vieron n’alta definición por BBC HD.