Blanco afirma que l'Autovía del Cantábricu va retrasase un añu

El Ministru afita que "nenguna infraestructura va llibrase del axuste", anque considera prioritaria l'Autovía del Cantábricu. Sicasí, considera "tirar el dineru" l'AVE del Cantábricu

"Aquelles infraestructures que tienen que ver col desendolque económicu del país y qu'apurren competitividá van siguir siendo prioritaries", señaló'l ministru de Fomentu en rempuesta a les entrugues de los periodistes momentos depués de pone-y el ramu al tramu Grau-Doriga, na Autovía Uviéu-La Espina.
  
Ante les entrugues de los periodistes el ministru aneció en que "l'autovía del Cantábricu ye una infraestructura prioritaria na so actuación pal Ministeriu de Fomentu, ye dende hai munchos años y va a siguir siendo", por ello indicó que van siguir col esfuerzu presupuestariu. Sicasí aneció en repetíes ocasiones en que "nun hai nin una sola infraestructura que nun tenga que sufrir della demoranza como resultáu del axuste presupuestariu". "Lo contrario nun sedría comprensible nin lo entenderíen los funcionarios públicos, nin el conxuntu de la sociedá", añadió.
  
Tocantes a la llegada del Alta Velocidá al Principáu, indicó que la mesma "nun s'apara" y añade que se ta trabayando colos proyectos previstos, polo que les previsiones cúmplense. Afirmó que'l tramu L.lena-Xixón entá ta en fase d'estudios y proyectu y añadió que "la prioridá ye que la xente d'Asturies tea en tres hores en Madrid", cumpliendo d'esa manera colo prometío na so postrera visita al país.
  
Recordó que'l tramu Lleón-La Robla salió a esposición pública'l 12 d'abril y añadió qu'a día de güei'l Ministeriu de Mediu Ambiente ta a la espera del informe de la Xunta de Castiella y Lleón pa una vegada recibíu da-y cursu. "L'axuste presupuestariu nun va torgar que'l Principáu seya la primer comunidá del Cantábricu en baxar de les tres hores el viaxe a Madrid", dixo Blanco.
 
L'Ave del Cantabriu ye "tirar el dineru"
  
Lo que nun consideró prioritario ye l'AVE del Cantábricu, una infraestructura qu'indicó "nun forma parte de los planes del Ministeriu" y que manifestó que'l mesmu nun se caltién por si mesmu, nin dende'l puntu de vista económicu, nin dende'l puntu de vista de la naturaleza".
  
"Nun ye una infraestructura caltenible y polo tanto yo nun toi dispuestu a tirar el dineru nuna inversión que mos abocaría al fracasu y dígolo con toa claridá", señala Blanco, que si defendió'l refuerzu de la llínea de FEVE qu'indicó tán pendientes del estudiu que dexe'l desdoblamientu de dalguna llínea. "Esa si ye una inversión que pue asumise", espresó'l ministru, qu'añadió qu'una vegada que finen los estudios van tomar les decisiones afayadices.
  
El titular de Fomentu recordó que nel periodu 2004-2009 Asturies recibió una inversión histórica"  del Gobiernu central que supunxo 3.660 millones d'euros executaos nel Principáu.
  
Sobre'l tramu inauguráu güei destacó la so importancia y esplicó que se trata d'un tramu que supunxo una inversión de 80 millones d'euros pa poco más de cuatro kilómetru d'autovía. "Tamos ante un tramu d'autovía a preciu d'alta velocidá", dixo Blanco qu'añadió que se trataba d'un gran retu técnicu y medioambiental.
  
José Blanco aprovechó amás la so intervención p'anunciar que  primero qu'acabe l'añu va entrar en serviciu la primer calzada del tramu Salas-La Espina.
  
Pela cueta'l ministru refirióse tamién a la importancia del Puertu del Musel na competitividá de la economía asturiana y del país y a les autopistes del Mar. Asina indicó que la primer llínea Nantes-Xixón va entrar en funcionamientu en setiembre con un actu nel que van tar presentes el presidente d'España, José Luis Rodríguez Zapatero y el francés, Nicolás Sarkozy.