Bruseles suxere retrasar la edá de xubilación hasta los 70 años

La Comisión Europea suxirió retrasar la edá de xubilación hasta los 70 años en 2060 pa evitar que bramen los sistemes de pensiones y garantizar la caltenimientu de les finances.

"Garantizar que'l tiempu de xubilación nun siga medrando en comparanza col tiempu pasao trabayao contribuyiría a l'adecuación y al caltenimientu (de les pensiones). Esto significa aumentar la edá en qu'unu dexa de trabayar y percibe una pensión", afirma l'Executivu comunal nun documentu de consulta publicáu esti miércoles.

"Aumentar les vides llaborales pa reflexar los continuos aumentos n'esperanza de vida a lo llargo del tiempu va xenerar un doble dividendu: mayor calidá de vida y pensiones más afayadices", afita l'Executivu comunal.
  
Nos caberos meses, dellos Estaos miembros retrasaron la edá de xubilación y otros camienten facelo. Alemaña, Países Baxos y Dinamarca asitiáronla en 67 años y Reinu Xuníu en 68. N'España, el Gobiernu propunxo tamién pasar de los 65 a los 67 años.
  
Mientres los postreros 50 años, la esperanza de vida na UE medró de media 5 años. Acordies coles últimes proyecciones demográfiques, d'equí a 2060 podría producise una nueva medría d'alredor de 7 años.
  
Si a esti suman les baxes tases de fertilidá que se rexistren nos Estaos miembros, la resultancia ye que la tasa de dependencia va doblase:  ente qu'agora hai cuatro persones n'edá de trabayar per cada mayor de 65 años, en 2060 namás va haber dos persones n'edá de trabayar per cada mayor de 65 años, según los datos de Bruxeles.
  
"Si siguen los enclinos actuales, la situación nun se pue mantener. Nun siendo que les persones, na midida na que viven más tiempu, tamién permanezan más tiempu nel mercáu de trabayu, o bien la cuantía de les pensiones va sufrir o bien se va producir un aumentu que nun se pue mantener nel gastu por pensión", sollerta'l documentu de consulta publicáu pol Executivu comunal.
  
"L'impactu d'esti retu demográficu, que resultó agraváu pola crisis, va tender a amenorgar la crecedera económica y a aumentar la presión sobre les finances públiques", resaltó la Comisión.
  
Na actualidá, la edá real de xubilación na XE asítiase de media en 61,4 años. España ta llixeramente percima del la media comunal, en 62,6 años.
  
Acordies colos cálculos de Bruseles, pa que la tasa de dependencia calténgase estable, la edá de xubilación media na XE tendría de retrasase hasta 67 años en 2040 y otros tres años ente 2040 y 2060.