Os Ozcos, Taramundi y Quirós recuperen la so toponimia

La Xunta Asesora de Toponimia aprobó ayeri la revisión de los topónimos oficiales de cinco conceyos: Samartín d'Ozcos, Santalla d'Ozcos, Vilanova d'Ozcos, Quirós y Taramundi.

Según les previsiones de la Conseyería de Cultura y Turismu, los topónimos tradicionales de Quirós y Taramundi, lo mesmo que de los tres conceyos de los Ozcos, van poder ser oficializaos en feches próximes pol Conseyu de Gobiernu, sumándose a los 42 conceyos que nestos momentos yá recuperaron la so toponimia tradicional.

Asina, en setiembre van ser 47 los conceyos asturianos que tengan completáu'l so procesu de normalización toponímica. Ye de reseñar que de los cinco conceyos, cuatro son de fala eonaviega, la zona d’Asturies con menos conceyos cola toponimia aprobada.

Según indiquen dende a Conseyería, con estes actuaciones el Principáu avanza, “pasu a pasu”, nel so oxetivu de completar la revisión de la toponimia de los 78 conceyos. “Ye un procesu de revisión necesariamente llargu y refechu, empecipiáu previu pidimientu de los mesmos Conceyos, nel qu'intervienen los partíos políticos con representación municipal, los colectivos de vecinos, les asociaciones de la zona, l'Academia de la Llingua Asturiana y l'Universidá d'Uviéu, asina como investigadores, encuestadores y espertos en toponimia”.

Un procesu, que según señalen, ye sistemático y rigoroso, “trabayando, aldericando y revisando les formes toponímiques hasta algamar alcuerdos y soluciones de consensu”.

“Este foi'l procedimientu de trabayu siguíu en cada unu de los decretos de oficialización toponímica de los conceyos completaos hasta la fecha, unos decretos que correspuenden a miles y miles de topónimos tradicionales, usaos y aceptaos pola xente y qu'agora adquieren la condición d'oficiales”, apunten pa finar.