El PP esixe a Blanco qu'esclarie plazos ya inversión de Fomentu

Ovidio Sánchez esixe al ministru de Fomentu, José Blanco, qu'esclarie "los plazos, les obres y la inversión" del so departamentu nel Principáu na so próxima visita a la comunidá.

Pa Sánchez, el ministru tien d'esclariar cuándo va rematar el trescale del tren d'Alta Velocidá n'Asturies, hasta ónde va llegar l'AVE, en qué momentu va entamar a furrular, y si sigue calteniendo la fecha de 2012.

"Lo que sí ta claro ye qu'Asturies perdió ocho años p'asitiar el trazáu de l'AVE ente La Pola L.lena, Uviéu y Xixón. Sedría bono tamién que valorara'l so arrenunciu esplícitu a L'AVE del Cantábricu", señaló esti martes Ovidio Sánchez.
  
El presidente del PP asturianu sorrayó nun escritu que "ye inconcebible que tres munchos años oyendo promeses y escuchando palabres vacíes de los dirixentes socialistes, Asturies siga sufriendo demorances intolerables nes infraestructures de primera xeneración. Toes eses obres yá tendríen que tar finaes. Tamos fartos de xides, de les continues xides del Ministeriu de Fomentu y del Delegáu de Gobiernu".
  
Al respective de l'Autovía del Cantábricu, Sánchez señaló que "el tramu Unquera-Llanes camudó de fecha de finalización prácticamente añu tres d'añu. La postrera, xunu de 2011, y agora Trevín yá nos alvierte d'una nueva reprogramación pola crisis. Ye una tomadura de pelo. Los recortes tán utilizándose como una cortina de fumu ante unes infraestructures que teníen que tar terminaes hai años".
  
Amás, aneció en que "na parte occidental de l'Autoría del Cantábricu la situación ye bien asemeyada, y dende'l Partíu Popular d'Asturies tamién s'espera que'l ministru esclarie la conclusión de los tramos Muros-Las Dueñas, Las Dueñas-Novellana, Outur-Villapedre y Tapia-Navia. Toes con cambeos y tardances nes feches de finalización". Coles mesmes, añadió qu'obres como'l Túnel del Fitu y l'Escayu-Ponferrada "paecen sentenciaes como L'AVE del Cantábricu".
  
A lo último, Ovidio Sánchez aneció en que "la parada, el retrasu y la falta d'inversión" del Ministeriu de Fomentu n'Asturies va tener la so incidencia nel mercáu de trabayu yá que "los gobiernos socialistes en vez de recortar la so alministración y los sos gabinetes, retayen la inversión n'obra pública que xenera emplegu".
  
"Esperamos que'l ministru concrete na so visita, pero la nuesa esperiencia demuéstranos que los gobiernos socialistes viven única y puramente de palabres y promeses, enxamás de fechos", matizó.