Día del Llibru Asturianu

El PP volverá pidir al Principáu que "endelgace l'Alministración"

|

El Grupu Parlamentariu Popular volverá pidir al Gobiernu que "endelgace l'Alministración y qu'axuste los chiringos socialistes y non sobre los ciudadanos".

Sedrá mientres el Plenu estraordinariu pa debatir y votar la llei de midíes urxentes de contención del gastu y reducción del déficit públicu a la que persentarán una enmienda a la totalidá.
  
En rueda prensa, el presidente del PP d'Asturies, Ovidio Sánchez y la diputada Alejandra Cuétara, refiriéronse a les midíes d'axuste y destacaron que "el recursu fácil ye subir los impuestos, pero nun se va al fondu del problema y fáense 'cures de caballu'".  Cuétara sorrayó qu'una subida d'impuestos namás va llograr baxar la competitividá y el consumu. Per otra  parte, propunxo aforrar na rede de comisiones esistentes nes Conseyeríes, que calificó de "sangría pal contribuyente".
  
Nesti sen, señaló a les Conseyeríes d'Industria, y Cultura y Turismu, de les que dixo "son namás dos exemplos de lo que podríamos aforrar". Asina, esplicó que nel casu d'Industria "el dineru va de la Conseyería al sector priváu", pero pasando de primeres per un departamentu d'Apoyu Financieru y Participación n'Empreses Públiques, l'Idepa, Asturgar y Soxepsa.
  
Lo mesmo pasa con Cultura, que tresfier el so presupuestu a la Dirección Xeneral de Turismu, la Sociedá Rexonal de Turismu, y d'ehí a les fundaciones y el sector priváu. Según dixo la diputada "esta situación tien qu'atayase", y pa ello pidió al Principáu "que reflexone y dexe de vender 'cures de caballu'".
  
Pela so parte, Ovidio Sánchez acusó al Gobiernu d'Areces de ser "cómpliz" del Gobiernu Central, y facer casu omisu a les propuestes del PP basaes en "controlar el gastu p'aumentar el consumu", según dixo.

Comentarios

Nesto'l PP tien tola razón. La rede clientelar que vien texendo la FSA n'Asturies y en bien de los Ayuntamientos que controla (lo de Xixón mete miéu...) ye impresionante. Y hai que tener que cuenta que toos esos "puestinos" son a deu, ye dicir, nun pasaron nin tan siquiera per una oposición. Toi seguru que si recortaren un 50% estos puestos nun díbamos a notalo en nada más que diba a haber más perres pa educación, sanidá. O superpuertos o llaborales, nunca se sabe con esta xente.
La pregunta ye: ¿Si'l PP tuviera nel poder más de 10 años nun fairía lo mesmo? Si nun nos metalizamos en que hai d'acabar col bipartidismu mal vamos. Un saludu.

Contador Estadistiques