CC.OO y UXT llamen a apoyar la manifestación de güei n'Uviéu

Los sindicatos CC.OO y UXT fixeron un llamáu pa secundar la manifestación que se va celebrar güei n'Uviéu pa protestar contra los recortes salariales y sociales.

Según informaron ambos grupos sindicales, la manifestación va salir a les 19.30 hores del encruz de l'avenida de Galicia y la cai Cervantes. Esta protesta, que tamién ta convocada nes principales ciudaes españoles, enmárcase nel procesu de movilizaciones que va acabar cola fuelga xeneral del 29 de setiembre.
  
El manifiestu confederal ellaboráu por CC.OO y UXT espresa'l so refugu a les polítiques de recorte y alvierte que "una economía que nun crea empléu nun val a los ciudadanos, y unos gobiernos qu'actúen contra los sos intereses, tampoco".
  
Ambos creen que la reforma llaboral "nun va valir pa crear empléu, va aumentar la temporalidá, facilita y abarata'l despidu, refuerza'l poder empresarial, debilita la negociación colectiva y privatiza la xestión del desempléu". Amás, añadieron que con esta ofensiva "lo que se ta reclamando ye l'absoluta desregulación del mercáu de trabayu".
  
Esixeron amás, una política que "reduza'l déficit públicu pente medies de la subida de los ingresos y non pente medies de la reducción del gastu"; "la retirada d'una reforma llaboral lesiva"; asina como "defender el sistema públicu de pensiones", ente otres midíes.